Sevilla – Xixón en moto, mil kilómetros d’aventura en tres etapes: gastronomía, contrastes de paisaxe, padremoñu, diversidá cultural, ufierta bayurosa de servicios y bon asfaltu
Un total de 150 motocicletes van participar del 27 al 30 d’abril nel I Rally Turísticu Ruta Vía la Plata, una prueba non competitiva que va percorrer la hestórica N-630 (y A-66) dende Sevilla fasta Xixón. aventura col sofitu de la de la Red de Cooperación de Ciudades en la Ruta la Plata, a la que pertenez Xixón.
El rally va entamar en Sevilla el xueves 27 d’abril pela tarde y va terminar el día 30 en Xixón. Ye una ruta 100% asfaltu y concibióse pal esfrute de los participantes, ensin nengún tipu de calter competitivu. El primer díe van realizase les verificaciones téuniques y va entregase’l welcome pack, roadbook y pasaporte, que va ser preciso acuñar a diario a la salida y en cada control de pasu que los motociclistes atoparán a lo llargo de la ruta. En llegando a la meta’l día últimu, colocaráse’l cuñu caberu y apurriráse un obsequiu Finisher. «Los participantes podrán esfrutar de los innumerables atractivos naturales, hestóricos, artísticos y gastronómicos qu’ufre un de los itinerarios más espectaculares de tola Península Ibérica, con una ruta fecha a la midía de los aficionaos a los viaxes en moto. El percorríu caltendráse’n secretu fasta’l 1 de febreru», desplica’l presidente de la Red de Cooperación, José Miguel Palazuelo.
La preba avanza per cuasi mil kilómetros creando un itinerariu ablucante, con delles ciudaes Padremoñu de la Humanidá, puertos míticos de montaña, una montonera de manifestaciones artístiques y monumentales de primera, y una naturaleza cambiante que va dende los campos d’Andalucía fasta les elevaciones de la Cordelera Cantábrica, travesando les deheses y les viesques d’encines y monte baxo estremeñes, y pasando pelos horizontes pictóricos de la meseta castellana p’aportar a la fin a la costa en Xixón. Nel percorríu, van realizase incursiones a puntos d’interés y tramos que, a pesar de dexar la N-630, van aguapecer les xornaes de conduición dándo-y un plus d’aventura .
Iscripciones
Les iscripciones puen formalizase de magar el díe 1 de febreru na web www.rallyrutaviadelaplata.com. Al ser places limitaes, los motoristes interesaos en sumase al eventu van tener de completar la iscripción pa nun quedar fuera del cupu máximu de 150 motos, siempres que seyan de cilindrada mayor a 250 c.c. El coste va ser de 150 euros por pilotu y 125 euros por acompañante, ya inclúi welcome pack, Roadbook, pasaporte, personal de staff, asistencia mecánica demientres tola ruta y cena final el llunes 30 d’abril na playa de Xixón. Arriendes d’ello, los patrocinadores del eventu van ufrir daos y ufiertes especiales a los participantes. Tamién va realizase un reportaxe fotográficu y en videu. L’agospiu nun ta incluyíu, pero la organización ufre un pack n’hoteles de 4* en réxime d’A/D. Esta opción pue tramitase dafechu con Travelbike.
Pela so parte, la Red de Cooperación de Ciudades en la Ruta la Plata pon a disposición de los viaxeros que se desplacen en moto una tarxeta qu’ufre descuentos en dellos establecimientos, la Moto Vía Card; y un pasaporte que pue ser acuñáu nes cases conceyu, oficines de turismu y agospios de les ciudaes que pertenecen a la rede. Amás de valir como credencial de les etapes, en completando un mínimu de diez caxellos ye posible participar nun sortéu anual. La tarxeta y el pasaporte nun tienen caducidá. Dambos dos puen solicitase na web www.rutadelaplata.com
La llexendaria N-630 (o l’autovía A66) conduz dende Sevilla fasta Xixón (nel sen sur-norte) per un viaxe nel tiempu auténticu a traviés de la mítica Vía de la Plata, ún de los caminos más antiguos de la Península Ibérica.
La Red de Cooperación de Ciudades en la Ruta la Plata ye una asociación voluntaria y ensin ánimu de arriquecimientu constituyida por ciudaes asitiaes na nomada Ruta y na so área d’influencia. El so envís ye dar a conocer los recursos turísticos de les poblaciones que la integren y dar valir a la montonera d’atractivos qu’esti itinerariu representa pola so variedá y amplitú.
Anguaño, la rede ta compuesta por 27 conceyos: Xixón, Llanera, La Ribera, Morcín, Riosa, Mieres, Ayer, L.lena, La Pola de Gordón, Llión, La Bañeza, Benavente, Zamora, Guijuelo, Béjar, Baños de Montemayor, Hervás, Plasencia, Casar de Cáceres, Mérida, Los Santos de Maimona, Zafra, Calzadilla de los Barros, Fuente de Cantos, Montemolín, Carmona y Sevilla.
Redaición InfoAsturies
This work is licensed under a Creative Commons Attribution 4.0 International License.
