AstuEnerxía defínese como un proyectu cooperativu de consumu d’enerxía anovable col que pretende fomentase la transición a un nuevu modelu enerxéticu más caltenible, más participativu y más respetuosu col mediuambiente, pa lo que van comercializar  per primer vegada n’Asturies enerxía lléutrica con garantía d’orixe 100% anovable

AstuEnerxía va comercializar eletricidá verde a partir del sistema d’usu de los certificaos de garantía d’orixe. Na cooperativa son 100% anovables, asina que los certificaos verdes garanticen qu’el 100% de la enerxía que consumieron los sos socios consumidores foi xenerada por dalguna instalación productora d’enerxía anovable.

La cooperativa crease ensin ánimu d’arriquecimientu “yá que creemos que la enerxía ye un bien básicu para la sociedá actual”. Para los creadores de la cooperativa, ye importante ser conscientes de lo que consumimos, cómo y a quién-y damos el nuesu dineru «Los cambeos faense ente toos”. El destín de los beneficios va decidise ente los socios, que van poder optar por baxase la tarifa o reinvertirlos en nuevos proyeutos rellacionaos cola mesma AstuEnerxia.

La falta d’información ye un de los problemes colos que se suel atopar el consumidor a la de contratar tarifes lléutriques, pero nesti casu les decisiones van ser tomaes ente tolos socios, lo que facilita de manera importante’l fluxu d’información. Amás, l’ámbitu territorial ye Asturies, lo que garantiza la cercanía y facilita l’alcuerdu d’intereses.

Ayeri cerróse’l censu inicial de socios y esta mañana remata’l plazu pa la recoyida de la documentación de los que quieran asistir a l’Asamblea Costituyente.

Los socios realizaron un primer ingresu de 100 euros al capital social de la cooperativa, nun únicu pagu, ensin cuotes y reembolsable baxu condiciones. Con esti capital inicial la cooperativa empecipia la so actividá.

Nuria Prendes

This work is licensed under a Creative Commons Attribution 4.0 International License.