Un estudiu de CCOO pon n’evidencia que’l númberu de places de Mélicu Internu Residente (MIR) redúcense n’Asturies más del triple que n’España

Nel mencionáu estudiu espéyase que nesti añu namás hai 143 vacantes de places MIR –pa la formación n’especialidaes méliques- n’Asturies, lo que supón un amenorgamientu de 32 places respeutu a les esistentes en 2010 y yá per aquel entós mui insuficicientes pa les necesidaes asturianes.

En España la perda de places MIR nestos años foi de 435 -indesplicable dao la necesidá esistente de mélicos especialistes- ello ye, un amenorgamientu menor d’una tercer parte que nel casu d’Asturies en rellación cola población.

Si a ello-y amestamos que la Universidá d’Uviéu vien a sacar la mitá de les places que-y correspuenderíen en función del númberu habitantes y que’l SESPA (Seguranza Social “Principado” d’Asturies)  nun contrata al númberu de mélicos que precisa pa facer frente a la demanda poblacional, atopámosmos con que un asturianu que quiera estudiar melecina nel so país tendrálo el doble de dificil que cualisquier otru del Estáu, y otru tantu pa poder facer una especialidá… nun digamos yá pa ser contratáu nel SESPA.

Por supuestu, ente esta situación nun gutia nin el “Principado” nin los partíos con representación istitucional, únicamente CCOO atrévese a denunciar esta situación, y Andecha Astur, qu’afirma que “too sigue’l mesmu patrón, trátase de forciar a emigrar a tola mocedá asturiana, de faer d’Asturies una “bonita provincia del norte” onde namás queden xubilaos y cuatro camareros p’atender a turistes. Lo más paecío a un xenocidiu.”

Redaición InfoAsturies

This work is licensed under a Creative Commons Attribution 4.0 International License.