Andecha Astur considera una tomadura de pelu les conclusiones del estudiu, que sollerta pola futura falta de man d’obra n’Asturies

El BBVA señala como un “riesgu” la posible alza salarial qu’en teoría afeutaría a los trabayadores asturianos énte la falta de man d’obra de magar del añu 2019. Según l’estudiu, la conxunción de la emigración masiva d’asturianos col avieyamientu poblacional va provocar nel perbreve plazu d’un añu la práctica desapaición del paru. Ello ye que pa esti mesmu añu prevén que la cifra baxe al dolce per cientu.

Eso esmolez a los empresarios, una y bones esta teórica falta de mano d’obra forzaría una meyora de les condiciones llaborales y una xubida de los salarios nada deseyable. Ye de suponer que lluéu sintamos falar de polítiques de sofitu a la inmigración coles que desaniciar esta falta de trabayadores y caltener la precariedá llaboral a la que tamos avezaos.

Nun escaezamos que l’amenorgamientu de los porcentaxes de paraos l’añu pasáu encóntase básicamente nel amenorgamientu de persones n’edá llaboral y na emigración forzada de la mocedá, non en creación d’emplégu, atopándose inautiva más del 51% de la población.

Redaición InfoAsturies

This work is licensed under a Creative Commons Attribution 4.0 International License.