L’Asociación de Muyeres con Tiempu Propiu prepara pal 15 de Febreru a les 5 la tardi na Casa d’Alcuentros de la Pola Sieru una proyeición de cine cientrada na activista hondureña

Tres del ésitu de la proyeición del documental d’Amaranta  Salazar sobre los Indíxenes del Cauca, l’Asociación de Muyeres con Tiempu Propiu propón una nueva proyeición, que nesti casu va dir acompangada de llectura poética.

La sesión cinematográfica va cientrar na figura de l’activista hondureña Berta Cáceres, coordinaora que foi del COPINH, organización que recibió’l caberu Premiu Internacional DDHH del Conceyu Sieru, asesinada hai cuasi dos años ensin que se fixera xusticia y a la que Xulio Arbesú y Anabel Santiago dedicaron el canciar: “Alcuérdome de l’Agua”.

van proyeutase dos curtios: “Un Canciu d’Amor pa Berta”, y “Berta Vive”, y van compartise poemes del llibru que coordinó Xabier Suspérregui con debuxos y poesía dedicada a la representante del pueblu lenca.

Redaición InfoAsturies

This work is licensed under a Creative Commons Attribution 4.0 International License.