Andecha Astur denuncia l’enfotu puestu por dellos sectores pa destacar los fraudes aisllaos de la renta social como xeneralizables y plantega l’ampliación de la mesma a toa Asturies
Les tarxetes de la renta social, gracies a les que los beneficiarios -presones o families en situación de bien alta vulnerabilidá- puen normalizar la so vida, aportando a bienes básicos como ropa, calzáu, material oftalmolóxicu y ortopédicu, llétrodomésticos básicos o melecines, considérense una de les meyores midíes adoutaes pa lluchar contra la esclusión social. Coles mesmes ye posible mercar productos de necesidá evidente, nun siendo posible la so monetización nin el so usu pa otros consumos.
Pal comerciu llocal tamién constitúi un importante puxu, una y bones toles tiendes nes que pueden realizase les compres pertenecen a la rede del pequenu comerciu xixonés, que vio amontaes les sos vientes con compradores que d’otra mena recurríen a cientros comerciales o low cost pa efectuar les sos compres.
Sicasí, dellos medios informativos publiquen regularmente información sobro presuntes estafes realizaes polos perceptores de la Renta Social, asitiando a la opinión pública en contra d’esta midida. Titulares como “Familias afincadas en Gijón con renta social revenden los productos financiados por el Ayuntamiento” ,” Hay comercios y beneficiarios de la renta social que simulan ventas, denuncia el PP” “Los usuarios, que cobran 2.000 euros, compran electrodomésticos que luego llevan sin usar a locales de segunda mano para obtener un doble beneficio” súmense a otros de tinte nidiamente xenófobu, comu el “Más del 15% de extranjeros” o los bulos espublizaos en redes “Gijón da una tarjeta VISA a inmigrantes y se gastan el dinero en productos de lujo”.
En xunto, denuncia Arturu Bermeyu, Secretariu Xeneral d’Andecha Astur, lo que se ve ye “un claru intentu per parte del PP y el so ámbetu de criminalizar una midía que non solo tien de caltenese en Xixón, sinón que tendría d’ampliase a toa Asturies”. Bermeyu destacó tamién la debilidá del argumentu, plantegando la opción de treslladar el “hai beneficiarios de la renta social que…” por “hai cargos del PP que…”.
Llucía F. Marqués
This work is licensed under a Creative Commons Attribution 4.0 International License.
