Javier Álvarez Pastrana foi el ganador de la onceava edición d’esti premiu, convocáu pola Fundación Asturies XXI en collaboración cola revista LA SIDRA y padrocináu pol Llagar JR
“Esparder, protexer y dar puxu a la cultura sidrera, pescanciando la sidre non solo como bébora, sinón como una parte perimportante de la identidá asturiana; averar el arte al mundiu sidreru, apurriendo nueves formes de güeyar la sidre; xunir dos ámbetos, sidre y semeya, que tienen muncho qu’apurrir l’ún al otru y dexar costancia n’imáxenes de la fondura d’una relación de sieglos: sidre, mazana, Asturies”. Con esi enfotu, desplicaba Marcos A. Fernández, presidente de la Fundación Asturies XXI, ñació hai once años esti concursu, pioneru nel so xéneru, gracies al que agora mesmo se cuenta con un archivu visual de la sidre muncho más ricu.
Esti añu foron más de mediu centenar los autores que s’enfrentaron al retu, con 171 semeyes de perbona calidá y cargaes de simbolismu que ficieron abegosu’l trabayu del xuráu, compuestu por José Pañeda y Alberto Otero, dambos fotógrafos; Aurora Vigil-Escalera, direutora de la galería d’arte del mesmu nome; Pedro Gutiérrez, vicepresidente de la FAAF y presidente del Grupo Zona 5 de Xixón; el presidente del tribunal foi Luis J. Vigil-Escalera Quintanal, presidente de la FAAF y de Asemeyando Asociación fotográfica, collaboraora col concursu.
El Primer Premiu foi pa “Escanciando”, de Javier Álvarez Pastrana, quien recibió de Juan J. Tomás, del Llagar JR , el premiu consistente en 700 € y medalla d’oru de la CEF.
El Segundu Premiu dotáu con 250 € y medalla viaxó fasta Euskadi , siendo pa Jose Miguel Romero Barco pola so semeya “Sagarra 4”.
Ya’l terceru foi pa la obra “Guei toca manzana”, de José Agustín Gurruchaga.
Finalmente, la mención especial JR dotada con dos caxes de sidre del mencionáu llagar, foi pa Nuria Campos con “Escanciao”.
Les 20 semeyes finalistes de les presentaes al concursu tarán espuestes na Sidrería La Galana (Plaza Mayor. Xixón), fasta l’ún de xunu, cuando entamarán como cada añu un percorríu d’esposiciones por cientros culturales, chigres y colexos.
Llucía F. Marqués
This work is licensed under a Creative Commons Attribution 4.0 International License.
