L’Aniciativa Ciudadana Europea “Minority SafePack” reclama los drechos los más de 50 millones d’europeos pertenecientes a minoríes nacionales y/o que falen un idioma de los llamaos minoritarios.
Los drechos de les minoríes llingüístiques, ente les que ta esplícitamente recoyíu l’asturianu como llingua europea minorizada, tán reconocíos nos Trataos de la Unión Europea. Anguañu, como los asturianos podemos comprebar a diariu, les ferramientes que la X.E. pon al algame de los falantes pa garantizar qu’estos drechos seyan efeutivos, son bien febles, siendo más que na una declaración d’intenciones que nun obliguen a res a los Estaos Miembros.
Lo qu’en resume pidi el Minority Safe Pack ye la toma de midíes que pare y de la vuelta al procesu d’estinción de llingües y cultures n’Europa, acesu igualitariu a los fondos europeos, la creación d’un cientru dedicáu a la diversidá llingüística, el reconocimientu y l’estudiu del rol de les minories, acesu ensin llendes a información y arruelu na llingua ma, la eliminación de torques alministratives y financieres ya’l reconocimientu de los drechos de les presones pertenecientes a naciones ensin estáu.
Esta Iniciativa Ciudadana Europea forciaría, en casu de consiguir a tiempu el millón de firmes que precisa, a que les istituciones de la Xunión Europea desendolcaren una lexislación venceyante que protexa los drechos llingüísticos d’estos cincuenta millones d’europeos, incluyendo a los asturianos, pertenecientes a minoríes nacionales y llingüístiques, reforciando asina la bayura cultural y llingüística de la Xunión.
Fasta l’intre, sumando les que se mandaren per internet y les recoyíes en papel, cuéntase con alrodiu de les 700.000 robles, del millón que fai falta algamar. La fecha másima pa participar ye’l díe 3 del mes d’abril, asina que’l tiempu ta escosándose y los asturianos podemos dar l’emburrión que falta a l’aniciativa p’algamar l’ésitu.
El Minority SafePack foi entamáu por FUEN, la mayor organización paragües de grupos autóctonos, minoríes hestóriques y grupos de defensa d’estremaes llingües d’Europa.
Llucía F. Marqués
This work is licensed under a Creative Commons Attribution 4.0 International License.
