Esti añu la UNESCO dedica esti díi a l’oxetivu xeneral d’una educación plurillingüe qu’incluya l’usu de la llingua materna na ensiñanza

“De magar el 1999 el 21 de febreru, ye’l díi internacional dedicáu a les llingües maternes. Los asturianos siguimos ensin tener reconocíu el drechu a la de nueso.” Con eses pallabres entama la declaración de Lola Suarez, responsable de la estaya de Llingua de la organización política Andecha Astur, nel díi en que se cellebra internacionalmente el drechu al usu  ya’l deber de proteición de la llingua llariega.

Pa la organización política la Oficialidá ye l’únicu camín viable nel qu’avanzar na dignificación de la llingua asturiana “de ser oficial l’asturianu nun tendría porque aguantar la tremenda cantidá d’humildaciones, abusos, torgues y ofienses que tamos careciendo nos caberos tiempos” seique venceyó’l xorrecimientu de los ataques a la preocupación de les estayes más españolistes de la sociedá ante la posibilidá de l’aprebación de la oficialidá darréu.

Recalcó la inutilidá de les “Proposiciones de apoyo” ya’l posturéu ante una situación que precisa pasos firmes y actuaciones decidies poniendo enfotu nel fechu de que “Andecha Astur ye l’únicu partíu que, de magar venti años, lleva lluchando con tolos sos medios pola Oficialidá de la llingua, ensin ambigüedaes, medies pallabres nin postureos.”

Pa finar, remembró que la oficialidá nun ye en si un destín, sinón un pasu imprescindible nel camín de dignificación de la llingua nacional “La Oficialidá aportará, pero hai que curiar que seya en condiciones y que nun se retrase más nin acabe marafundiándose too con una “oficialidá de mínimos”, una “oficialidá en fases”, galleguizando l’ocidente asturianu, o allargándose la so aprebación fasta l’infinitu”.

Redaición InfoAsturies

This work is licensed under a Creative Commons Attribution 4.0 International License.