El “Principado” tresllada datos manipoliaos al Ministeriu d’Agricultura y ésti a la Comisión Europea sobro la contaminación na fastera cientral asturiana
La ministra d’Agricultura y Pesca, Alimentación y Mediu Ambiente, Isabel García Tejerina declaraba apocayá nel Congresu los Diputaos que “el gobiernu cumple cola llexislación europea”, contradiciendo asina la evidencia y les informaciones recoyíes pola comisión d’Andecha Astur na so visita al parlamentu européu, onde Roel Hoenders, Oficial de polítiques de la Comisión Europea encargada del control de la calidá del aire y emisiones industriales, afirmó qu’España cumple “escasamente un 60% de les direutives europees en materia de mediu ambiente”. Nesa mesma xunta, na que s’apurrieron al comisionáu los datos oficiales actualizaos, pudo comprebase que los datos colos que cunta la comisión europea son escasos, sesgaos y apurríos con retrasu.
Tejerina llega al puntu de declarar qu’en Asturies nun hai más qu’una estación fora de rangu y que esto débese al so allugamientu averáu a un puntu de contaminación, cuando tolos datos, mesmo los engañosos datos oficiales, son muncho más graves de lo qu’apunta esta declaración.
Acordies los datos apurríos pola Coordinadora Ecoloxista d’Asturies, quien van unviar nuevamente’l resume de los datos oficiales de la contaminación del aire n’Asturies 2017 al parllamentu européu, esti ye’l resume de los puntos prietos del aire n’Asturies:
Nel casu de les partícules de menos de 10 micres, les PM10, cuatro estaciones superaron el valor llende promediu añal de 40 µg/m3, dos en Xixón, la del Musel con una media añal de 50 µg/m3 y la de Montiana, con una media añal de 43 µg/m3, la de Trasona1, en Corvera con una media añal de 41 µg/m3, la de San Xuan de Nieva en Gozón con una media añal de 41 µg/m3 y la mentada pola ministra en Les Arobies, Avilés, con una media añal de 44 µg/m3 .
Tamién se consideren zones altamente contaminaes les estaciones que superen más de 35 díes al añu una media diaria de 50 µg/m3, daqué qu’asocedió enTrasona2, Corvera, con 50 díes superaos, Santiago de Santiao d’Ambiedes en Gozón con 47 díes y L’Espartal en Castrillón con 43 díes.
Si a esto amiestamos los valores algamaos nes estaciones portátiles, que tuvieron midiendo esporádicamente de forma validá y analizando los datos a medies añales, danos: San Xuan en Castrillón con una media de 55 µg/m3 y 203 díes superaos, Llorgozana en Carreño con una media de 51 µg/m3 y 124 díes superaos y trés más en Xixón, el Xeriátricu del Lloredal ,con una media de 48 µg/m3 y 136 díes superaos, Parque del Lloredal con una media de 42 µg/m3 y 109 díes superaos y el con una media de 42 µg/m3 y 86 díes superaos.
Resumiendo, estudiando solo les PM10 yá son catorce y nun una les estaciones qu’entepasaron les llendes añales llegales.
La partícules nun son l’únicu problema, n’Uviéu sábese que mientres el 2017 superóse la media añal permitía tocantes a emisiones de bencenu -un contaminante especialmente peligrosu pa la salú- datu que solo podemos comprebar gracies a la estación mididora qu’entamo a furrular nel 2016 .
Toos estos datos son los qu’amuesa’l Gobiernu d’Asturies na so web en cumplimientu de la obligación de comunicación diaria de contaminación atmosférica y calidá del aire, conforme afita la Direutiva 2008/50/CE y el R.D 102/2011.
Llucía F. Marqués
This work is licensed under a Creative Commons Attribution 4.0 International License.
