La Lliga Celta d’Asturies denuncia’l desaniciu d’emportantes evidencies hestóriques nel proyeutu d’obra del Chao de Samartín

Esti mes conocimos al traviés del Grupu Parlamentariu d’IX Asturies que lo que se prometía como una esperanzadora intervención n’ún de los nuesos xacimientos arqueolóxicos más singulares, el castru de Chao Samartín en Grandas de Salime, podría significar, en realidá, una fonda alteración del conxuntu, tantu de los restos escavaos como de superficies inda inédites pero con enorme potencial arqueolóxicu.

Tolos medios faen ecu de los defeutos téunicos del documentu qu’agora se denuncia: nun s’atienen a les convenciones internacionales ya ignórense los valores que faen d’estes ruines un documentu esceicional pa la conocencia de la hestoria d’Asturies. L’ausencia nel espediente d’informes ellaboraos por espertos en téuniques de restauración y caltenimientu arqueolóxicu, la falta de consultes ya investigaores especializaos que fueron responsables de la escavación ya interpretación histórica del xacimientu y l’aplicación de materiales y procedimientos irreversibles, incluyíu l’usu del formigón armáu, resines epoxídiques o la reconstrucción indiscriminada de murios, contravienen tolos encamientos y convenios internacionales qu’emponen les intervenciones en llugares arqueolóxicos.

La calidá paisaxística del conxuntu y la integridá de depósitos arqueolóxicos ricos y entá inexploraos van vese fatalmente comprometíes cola proyeutada costrución, sobro la fachada principal del xacimientu y en terrén arqueolóxicamente fértil, d’un edificiu d’acoyida, llevantáu malpenes a unos centenares de metros del cientru d’interpretación yá esistente.

Pero hai un aspeutu malpenes comentáu mientres la rueda de prensa que resulta especialmente esmolecedora. Y ye que, según se supo, cola execución d’estes obres pretende despintase, soterrar o destruyir les principales evidencies de la ocupación prehistórica del asentamientu: les ruines del primitivu asentamientu fortificáu de finales de la Edá del Bronce, escontra’l 800 a.C. (el más antiguu conocíu n’Asturies), van ser, asina consta lliteralmente nel proyectu, soterraes porque “el so interés nun ye bien eleváu”.

La mesma suerte van correr los elementos defensivos que prueben la intensa y socesiva fortificación del castru mientres la Edá del Fierro (fosos y fases antigües de les muralles) que van ser tamién soterraes pa, dizse, evitar la degradación estructural. A última hora, la execución de les intervenciones conteníes nos proyeutos d’obres urxentes y d’afitamientu de les ruines del Chao Samartín implica’l ocultamientu, desaniciu o falsificación d’elementos claves na interpretación del xacimientu, de la so hestoria y, poro, tamién de la Hestoria d’Asturies.

Ye paradóxico que mientres se nos brinda al traviés de les xornaes del RIDEA alcordances de les bondaes qu’apurrió y apurre l’arqueoloxía, en concretu l’arqueoloxía castreña, a la sociedá nel so conxuntu, tantu l’asturiana nesti casu, como la d’otres poblaciones del noroeste de la península Ibérica, coles mesmes, somos testigos, una vegada más de la más bochornosa incompetencia y desinterés absolutu per parte del actual Gobiernu d’Asturies pol nuesu patrimoniu históricu-cultural. ¿Cómo puede xustificase que sabiendo qu’esisten xacimientos por escavar, dalgunos de la Edá del Bronce y otros de la Edá del Fierro autorice un tipu d’obra civil que lliteralmente estrozaría estos xacimientos ensin posibilidá de recuperación? Cenciellamente nun pue xustificase… nun tien igua.

Ye por esto que dende la Lliga Celta d’Asturies desiximos al Gobiernu de Asturies que ponga frenu a esta xirigonza y cumpla cola so obligación que, nesti casu, ye la de protexer, caltener y garantizar la pervivencia d’esti patrimoniu, que ye de tolos asturianos y dedique más recursos a la investigación de la hestoria y cultura asturianes y menos a la so desapaición, como sería nesti casu concretu. Nun facer casu a esta petición sedría atentar escontra’l nuesu padrimoniu ensín xustificación nenguna.

 Gran plaza pavimentada del Chao Samartín. Malinterpretaes como esbarrumbes producíos tres la escavación, les evidencies qu’amuesen la violencia del seismu que causó la ruina del pobláu van ser destruyíes pa, en picando y rebaxando la base xeolóxica, construyir, sobro un encofráu de formigón armáu, un muriu de nueva factura contrachapáu con piedra caliar llocal”

 

Tolos restos correspondientes a les fases más antigües del pobláu, munchos d’ellos escepcionales n’Asturies, van ser soterraos y escluyíos del discursu xeneral de la visita pos “el so interés nun ye bien eleváu” (sic). Ente otros l’edificiu más antiguu topáu n’Asturies (800 a.C.).

Pa facilitar l’accesu a los fosos, nos que la so secuencia estratigráfica documenta episodios esceicionales de la refortificación del castru pol exércitu romanu, van ser estensamente alteriaos pola construcción d’una rampla.

El movimientu de tierra, bien cimera al que riquió dellos años d’escavación a un equipu especializáu, va ser realizáu con medios mecánicos y controláu como cualquier obra de carretera con un meru “siguimientu arqueolóxicu”.

Sobro estos mesmos elementos, les fortificaciones esteriores entá non escavaes, y ocupando un llugar clave pa la observación del xacimientu per parte del visitante dende’l Muséu y nel so aproximamientu a les ruines, va construyise un edificiu “d’acoyida”.

La obra va implicar la destrucción d’horizontes arqueolóxicos fértiles, el cambéu de la so morfoloxía y la degradación definitiva de la principal vista del xacimientu.

 Mo

Fernán Morán, Presidente de la Lliga Celta d’Asturies.

This work is licensed under a Creative Commons Attribution 4.0 International License.

• TagsChao SamartínLliga celta d'Asturies