Esta tardi fadráse una concentración en protesta pol preslle del edificiu, mentres Andecha Astur denuncia les intenciones especulatives de la Casa Conceyu no que considera una operación urbanística, un robu al pueblu de Sieru y un atentáu al padrimoniu hestóricu asturianu

L’edificiu del antigüu mataeru de La Pola Sieru vien siendo utilizáu, col respaldu de la Casa Conceyu, comu llar social y puntu d’alcuentru cultural y d’arruelu abiertu a la participación ciudadana, ufriendo un serviciu a la comunidá de baldre y calteniendo en bones condiciones un edificiu emportante en si mesmu poles sos implicaciones hestóriques.

L’alcaldía de Sieru tien la intención de presllar esti llar, cola esculpia d’una avería llétrica, ensin que se presentare dalu documentu téunicu qu’acredite la  imposibilidá de reparación de la mesma.

Andecha Astur ve nello una maniobra urbanística cola que l’ayuntamientu pretende algamar beneficiu económicu “Nun ye sinón un casu d’especulación urbanística qu’utiliza esta maniobra pa desagospiar un espaciu hestóricu y del pueblu, que va pasar por baltiar esti edificiu, un edificiu hestóricu de La Pola, resclavu d’un tiempu en que l’actividá ganaera permitía cuntar con un mataeru públicu municipal, colo que el so esbarrumbe sedría un ataque al padrimoniu y a la hestoria del conceyu, de la fastera y del país: una bones finaron con campu y la ganadería, quieren finar agora cola hestoria mesma.”

Esta tardi, de magar les 7 y cuartu, un manifestamientu saldrá del Llar El Mataeru, percorriendo les cais de La Pola pa amosar la solidaridá pa colos coleutivos que xestionen el Mataeru y pa comunica-y al alcalde de Sieru que’l pueblu nun va dexar qu’esti llugar d’alcuentru se preslle ensin más.

Redaición InfoAsturies

This work is licensed under a Creative Commons Attribution 4.0 International License.