El LXVII Congresu añal de l’Asociación de Floristes y la Copa d’Arte Floral 2018 atrae a Xixón a más de 300 de los meyores profesionales del ramu nel que ye l’eventu especializáu más importante del so seutor
La programación combina actos de calter profesional y d’arruelu, como la tradicional ufierta floral al pueblu de Xixón na Ilesia de San Pedro, una visita turística guiao pola ciodá y una tastia de lo meyor de la nuesa gastronomía nos restaurantes Las Delicias y Bellavista, combinao con delles actividaes dirixies al florista, como demostraciones d’arte floral, una sesión de coaching floral, un taller y un espectáculu floral.
Na competición de arte floral d’esti añu, seis artistes del mundiu les flores (Pilar Arriaga, Jorge Camino, Carles Jubany, María Miras, Salvador Miró e Irati Tamarit) participarán en seis prebes (composición de plantes, ramu de man, composición de grandes dimensiones, composición de mesa, composición de novia y trabayu sospresa). Cumpliendo cola normativa europea, el sistema de puntuación sedrá’l Sistema de 100 Puntos de Florint (International Florist Organisation) y los miembros del xuráu sedrán xueces certificaos: Rosa Valls, Alex Segura, Silvia Mir y Tracy Tomlinson.
P’averar l’arte floral a los ciudadanos de Xixón y dar a conocer la profesión de florista, la decoración floral del Congresu ornará estremaos espacios de la ciudad anfitriona ya’l domingu pola mañana abriráse al públicu la esposición colos trabayos de la Copa.
Llucía F. Marqués
This work is licensed under a Creative Commons Attribution 4.0 International License.
