Llucía F. Marqués

Nun soi fubolera, enxamás nun lo fui y nun pescancio los mecanismos que faen vibrar a la xente con una pelota pente tres palos. Ye por ello qu’ayeri, demientres toos escribien maravíes de Quini -cuasique vecín de mió, per otru lláu – yo siguía a lo de mió y esta nota póstuma aporta quiciás con retrasu

Pero tanta condolencia, pícome’l niqui, asina que lleí con más atención de lo avezao una noticia que trescendía ensin dubia lo fubolístico: daqué tien de tener quien recueye ciñu’l Sporting y l’Uviéu a un tiempu, poniéndose per delantre de la so rivalidá, comu representante del fúbol asturianu enteru. La camiseta col rótulu “Quini ye Dios” finó por animame a investigar.

Alcontréme con un home que lo mesmo salía d’una pipa sidre que recomendaba más llibertá a los guahes, que, quitándose siempres importancia, defendía lo de so y echaba un gabitu onde ficiere falta, un paisano más allá de toles piruetes fubolístiques … llamenté nun aprofitar la oportunidá diaria de saludalu pela cai cuando taba entá a tiempu. D’elli, quédome con una frase cola que pueo identifícame: “Soy asturianu perriba de tou y trato de dexar a Asturies no más alto”.

Sicasí, nun foi eso lo que m’animó a escribir esti comentariu tardíu, sinón una neña.

Diba yo ayeri, a eso les siete la tardi, nel autobús númberu cuatro -que fina al par del Molinón, estadio al que sin duda Quini no querría cambiar de nombre- y nun pude sinon decatame de que, de les venti presones que tenía al algame la mio vista, sedríemos escasamente siete les que nun llevabemos bandera, bufanda o camiseta’l Sporting.

Coime, pero si nun hai partíu…ah… non -entardé un cachu en filar idegues- que van al Molinón a despidise… vaya, ablucante. Yo -y los otros seies ensin el roxiblanco- debemos ser bichos raros.

Mientres camentaba neso, una rapacina d’unos ocho años, embutía fasta les ñarres nel so correspondiente abrigu verdi mar, revuelve intranquila nel asientu d’enfrente. A la fin diz-y con un dexe d’angustia al güelu -seriu, elegante, formal el paisano- “güelito, déxame posar l’abrigu, que nun se mos ve la camiseta” a lo que l’home retruca impasible “nun hai falta que se te vea la camiseta, los asturianos l’arguyu llevámoslu per dientro”.

Nun hai más que dicir.

This work is licensed under a Creative Commons Attribution 4.0 International License.