La Conseyería d’Educación vien d’espublizar nel BOPA la convocatoria d’oposiciones de 2018 pa los cuerpos de profesores de Secundaria y de Formación profesional, ensin atender a denguna de les 16 propuestes de meyora presentaes pol sindicatu

Primeramente a la convocatoria cellebróse una xunta de l’Alministración coles organizaciones sindicales de la Xunta Personal pa valorar un borraor del Resolvimientu pa la convocatoria de procedimientos seleutivos de 2018 n’Asturies. Sacantes cambeos introducíos pol MECD nel Real Decretu d’ingresu na función pública docente, la propuesta yera básicamente igual a la de convocatories anteriores, ensin cambeos d’aspeutos que xeneraren problemes.

SUATEA presentó 16 propuestes de meyora, pero la Conseyería fixo oyíos sordos a cualquier camudu qu’implique la xera d’introducir cambeos. Nun aceutaron nenguna de les propuestes de les OOSS.

Les propuestes realizaes por SUATEA ameyoraríen aspeutos rellacionaos cola execución y la tresparencia de los procesos seleutivos, amás de drechos de los miembros de los tribunales y de seguridá de los opositores, como la dispensa en determinaos casos pa formar parte de los tribunales, la necesidá d’un actu de presentación nel que se dean instrucciones sobro’l procesu, anantia d’esti, garantizar l’anonimatu de los participantes, afaer la prueba práutica a les especialidaes o que los criterios de correición y valoración de les estremaes prebes s’espublicen con siquier 72 hores d’antelación.

Una tema que tampoco nun se camudó, pesi a los problemes xeneraos en 2016, ye la inclusión como única causa de xustificación pa nun presentase a les oposiciones la hospitalización por motivos d’embarazu y/o partu, refugando otres causes de fuerza mayor, daqué d’especial gravedá considerando que ye obligatorio presentase a les oposiciones pa tar nes llistes d’interinidá polo que cualisquier circustancia adversa que torgue a daquién presentase a les oposiciones pue suponer la perda del emplegu. Asina asocedió nes oposiciones de 2016, cuando munches persones perdieron el so trabayu por un atascu monumental na autopista “Y”, o por una avería qu’afeutó a dellos trenes, o por fallecimientu d’un familiar de primer gráu, o por un problema de salú.

Finalmente pidíen un plazu de reclamación a les puntuaciones de la primer prueba, eliminatoria.

Redaición InfoAsturies

This work is licensed under a Creative Commons Attribution 4.0 International License.