La mesma organización ultra cristiana que se fizo famosa por denunciar “ofienses a la relixón” como la semeya montaxecola cara cristu, la Drag Queen que n’antroxu s’amarutó de Virxe o’l paséu d’un clítoris xigante en selmana santa, pente otros, carga agora contra’l derechu de les muyeres asturianes a decidir sobro’l so cuerpu y el so futuru

Dientro d’una macro acción contra una ventena de centros de too l’estáu que mos retrotraye al sieglu pasáu, Abogaos Cristianos demandó a les clíniques asturianes Belladona, Buenavista y Sirona, nes que se prautiquen interrupciones voluntaries del embarazu, allegando que nes sos páxines web “afalen” a les muyeres a albuertar, acusándoles de falsedá ya inclusive de “posible estafa”. Tamién empecipiaron una recoyía de robles al traviés d’internet, que lleva fasta’l momentu, nueve roblantes.
La llegalización de la interrupción voluntaria del embarazu y la so inclusión na seguridá social ye una de les meyores más importantes consiguíes poles muyeres nes caberes décades, ufriendo a la muyer la posibilidá de controlar la so propia vida y la so sesualidá, daqué qu’ofiende asgaya a estes organizaciones ultracatóliques.
Nun podemos escaecer qu’esta ye una cuestión de xéneru, pero tamién de clase: la penalización del albuertu afeutó nel so entós namás  a les muyeres que nun pudieron pagase’l desplazamientu a clíniques en países onde fuere llegal. Poro, amás de ser un preséu lliberador de la muyer ye tamién un elementu igualador de les clases sociales, lo que tamién ye malo d’asumir per parte de determinaos seutores de la sociedá española.
Dende la lliberalización l’albuertu n’Asturies, el númberu de muertes maternes y de llactantes amenorgóse bultablemente.

Llucía F. Marqués

This work is licensed under a Creative Commons Attribution 4.0 International License.