La xornada d’ayeri, coles muyeres en fuelga, concentraciones nes places de Conceyu’l país, piquetes y barricaes culminó en Xixón col manifestamientu más multitudinariu en dellos años

La xornada entamó ceo. A les doce la nueche les primeres compañeres salíen a la cai na marcha nuecherniega d’Uviéu, y foron delles les que pasaron les primeres hores del alborecer “orniando” les munches estatues masculines d’Asturies con mandiles ya escobes. Los piquetes -informativos- acompangaron dende primer hora a les que decidieron dir a trabayar, animándoles a participar na fuelga pero siendo coscientes de que munches que lo facíen yera por miéu (al patrón, al home, a ser despidía, a nun cobrar abondo pa pasar el mes, a la posterior represión…). Nun faltaron les pintaes nin les barricaes.

Pela mañana, colexos ensin mas que lleven los neños, mandiles nes ventanes, concentraciones en dellos cientros de trabayu, tiendes presllaes y chigres con llargues coles con camarerOs que nun daben a bastu.

Nes cases de Conceyu per toa Asturies, impresionantes concentraciones de miles de persones que ya daben una idega de lo que diba ser el manifestamientu de la tardi.

Uviéu, Xixón, Avilés, Noreña y Llangréu foron dalgunes de les llocalidaes nes que se cellebraron aconceyamientos.

A les 6 y media la tardi la Plaza l’Humedal ya yera un fervieru. A les siete entamó a salir la marcha; yeren más de les nueve cuando les caberes banderes entamaben el percorríu. Muyeres, neñes y vieyes, moces, rapacines y tamién dellos homes solidarizaos cola causa, una marea humana al glayíu de “Querémonos vives, llibres ya ensin miéu”

Si dalgo amosaron ayeri les asturianes y les muyeres del mundiu foi la so capacidá de convocatoria, de llucha y de movilización.

This work is licensed under a Creative Commons Attribution 4.0 International License.