Na trama podríen tar implicaes importantes personalidaes, pente ellos xueces, empresarios y políticos
L’abogáu Mario díez Fdez exerce l’acusación particular en defensa de 8 muyeres presuntes víctimes del investigáu Jose Juan Cabezudo Zabala, alies Cote Cabezudo -na semeya- al que se-y imputen delitos de produción y espardimientu de pornografía infantil, estafa, inxuries, menacies, abusu sesual, corrupción de menores y violación.
Nun videu espublizáu en internet Mario Díez denuncia con tou detalle lo asocedío, yá que, anque reconoz que la istrucción d’una causa penal tien calter de reserváu pa les partes -polo que nun puede nin tien de desvelar los detalles de lo que ta asocediendo y de lo que se-yos ta faciendo a les víctimes- tamién “soi ciudadanu d’un estáu de drechu y la llei imponnos el deber de denunciar aquellos fechos de los que tengamos conocencia y que seyan costitutivos de delitu”. L’abogáu tamién s’ampara nel derechu a la llibertá d’espresión ya información para espublizar la noticia.
Según informa l’abogáu, dos años y cinco meses dempués de la denuncia d’estos fechos, los videos de calter pornográficu protagonizaos poles presuntes víctimes, inclusive un nel que se recueye una violación, siguen disponibles y a la vienta n’internet, al módicu preciu de 14’95 € mensuales, ensin que se tomaren les midíes correspondientes pa ordenar la retirada o siquier bloquiar l’acesu a les páxines de manera cautelar, tal como ta previsto na llei pa les páxines web qu’esiban pornografía infantil. Esta llentitú contrasta llamativamente cola rápida retirada por orde xudicial de 140 webs mientres el procesu previu al referéndum en Cataluña. Les víctimes siguen clamiando que los videos seyan retiraos de la circulación.
Acordies un de los declarantes nel xuiciu, nos abusos sexuales a menores recoyíos nesti casu tán implicaos políticos, xueces, empresarios y banqueros, con nomes y apellíos, lo que desplicaría la llentitú ya’l secretismu del procesu.
Apocayá un tweet -que sí, esi pudo ser retiráu y bloquiáu darréu- espeyaba una acusación que va tomando ca vegada más pesu: “PNV y PP apauten callar los casos de pederastia nel casu de Cote Cabezudo”.
Mario Díez unvió información detallada a numberosos medios de comunicación de tol estáu, ensin que cuasi dengún se fixere entá ecu de la congoxa de les presuntes víctimes. En concretu, recibieron los datos los periódicos El País, el Mundo, La Razón, ABC, Espejo Público, Las Mañanas de Ana Rosa, El Objetivo, los informativos de TVE, Las mañanas de 4, Sin filtros -que sí espublizó la noticia- , “Más de uno” en Onda cero, Libertad digital y Julia en la Onda, ente otros.
InfoAsturies tamién recibió’l videu cola información, polo que consideramos importante tresmitilo a los nuesos llectores.
Llucía F. Marqués
This work is licensed under a Creative Commons Attribution 4.0 International License.
