El coleutivu feminista 8M y organizaciones contra la represión y la llei mordaza ya anunciaron que participarán activamente nos actos por unes pensiones dignes, publiques y actualizaes al coste real de la vida

El 8 M la sociedá volcóse coles muyeres; mañana espérase un sofitu al menos igual de fuerte a los pensionistes na defensa d’unos drechos que non solo son los que yos garanticen a ellos un presente dignu, sinon qu’enconten el futuru de tolos demás.

La cita ye mañana sábado 17 de marzu de magar les doce na Plaza El Bibio, en Xixón. Les reclamaciones, les mesmes que lleven aconceyando a los pensionistes cada xueves delantre les Cases de Conceyu: unes pensiones dignes, públiques y actualizaes al coste real de la vida (IPC), asina como una pensión mínima de 1.080 euros al mes, y una reforma de la llexislación no que cinca a esti tema, ya que la cabera reforma impuesta pol gobiernu español perpetuó’l retayu sistemáticu de facto de les pensiones, baxando’l so poder alquisitivu a un ritmu que, de nun camudar, fadría-yos perder más d’un 10% de capacidá alquisitiva en cinco años.

N’Asturies, viven más de 301.000 pensionistes, de los cuálos solo una mínima parte cobra la pensión másima, faciendo xubir la media fasta los 1.084 €, pero tando la gran mayoría alredor de los 600€ y siendo munchos los que cobren enforma menos. La media del SOVI (Seguru Obligatoriu de Vieyera ya Invalidez) ta ente 372 por xubilación y 388 la de vilbedá. La pensión d’ orfandá asitiase nos 453 € y la única qu’algama’l yá de por sí misérrimu Salariu mínimu interprofesional español (707€) ye la media de la pensión de vilbedá, con 718€. Les muyeres cobren de media la metá de pensión que los homes.

This work is licensed under a Creative Commons Attribution 4.0 International License.