Mientres a los cuerpos de seguridá del estáu se yos sube brutalmente los salarios y se plantega l’incrementu de plantiya, los servicios d’estinción d’incendios y proteición civil n’Asturies continúen baxo mínimos y les quemes descontrolaes amburen añalmente hectarees de monte
Los recortes nes plantiyes de bomberos en toa Asturies obliguen al retén destináu a la fastera del Trubia a furrular como parque movil pa cubrir la falta de plantiya n’otros conceyos. El comité d’empresa denuncia que l’actual serviciu d’estinción d’incendios que cubre dende Proaza fasta Somiéu nun ye abondu pa cubrir les necesidaes de forma eficiente, daqué que se ve agravao pol usu continúu del so personal pa reforciar otres zones d’Asturies.
“Si quema una casa en Quirós nun tamos en condiciones de garantizar la seguridá de los vecinos nin la del nuesu personal” declaró a La Voz del Trubia Manuel Sordo, bomberu conductor del parque de Proaza y miembru del comité d’empresa pol CSI, quien relata que llegó a desplazase 500 km nel mesmu díe a cubrir otros parques, dexando el de so ensin serviciu.
Trubia, Quirós, Teverga, Santu Adriano… son munches les poblaciones que queden d’avezu ensin proteición en casu d’emerxencia. La situación repítese ensin emportar si la fecha ye temporada alta de turismu nin si hai alerta por posibilidá d’incendios.
Llucía F. Marqués
Fonte: La Voz del Trubia
This work is licensed under a Creative Commons Attribution 4.0 International License.
