La Primer Sidre L’Añu ye la espicha más grande d’Asturies, lo que ye tanto comu decir la más grande qu’esiste, tantu por asistencia, como por númberu de llagares participantes: confirmaos más de 70

N’Asturies estes feches son sagraes: tiempu d’abrir toneles y probar la sidre nuevo. La PSLA ye la cita añal onde se tastien les primeres sidres de tolos llagares asturianos -y dalgún foriatu- pente música’l país y bayura d’actividaes

Los asistentes tendrán la posibilidá de tastiar la sidre de más de 70 llagares por namás 6 €, al tiempu qu’esfruten de la música’l país, la gastronomía de la tierra, concursos, xuegos pa la reciella, esportes tradicionales, tasties, esibiciones…

La PSLA tien una programación variada y pa toles edaes que tien en cuenta a estremaos coleutivos, pa que naide se sienta dexáu de lláu: carpa pa la reciella, espaciu pa mascotes, información multillingüe, sidre con y sin alcol, menú vexetarianu y espaciu cardioprotexíu son dalgunes de les novedaes que’l certame va amiestando al so formatu de folixa de práu.

Del 29 de marzu al 1 d’abril, nel Muséu del Pueblu d’Asturies, esta cellebración, declarada de raigañu social pol Conceyu de Xixón nagura la temporada sidrera asturiana, revindicando la sidre sobro la madre, ensin trasegar, una variedá de sidre que cayere nel escaezu pol procesu d’industrialización de los llagares, y qu’anguañu yá cunta con dellos llagares que la comercialicen.

Esti añu amás apurriráse a ca asistente un Mapa de chigres de Xixón, pa saber onde continuar al preslle de la PSLA, onde vienen indicaes les sidreríes de la ciudá.

Llucía F. Marqués

This work is licensed under a Creative Commons Attribution 4.0 International License.