Llucía F. Marqués

Selmana Santa n’Asturies. Estrenar la primavera en ramos, canciar al altu la lleva, pegarates, sidre, güevos pintos, el bollu, espiches. Sicasí los medios de desinformación en pleno recueyen prauticamente namás les procesiones relixoses, residuales, anacróniques, más turístiques que sentíes y de raigañu foriatu

Recién finada la Selmana Santa echo una güeyada a los periódicos d’estos díes. Les procesiones d’encapuchaos tienen sitiu en toles portaes, con pallabres grandones comu “pasión” “tradición” o “fervor”. Sicasí, pa la gran mayoría de los asturianos estes procesiones son dafechamente desconocies y si les cruzamos por casualidá, más que fervor, sentimos una mecigaya de curiosidá estrañada y estupor ante un cuadru más sevillanu que propiu.

Otra vegada la imposición cultural foriata utiliza tolos medios al so algame pa convencenos de qu’esos son los nuesos raigaños, que, nel fondo, somos andaluces.

Pues non, señores, pa los asturianos Selmana Santa ye otra cosa: ye abrir los toneles pa ver como salió la sidre esti añu y compartila cola nuesa xente, ye canciar al altu la lleva, saludar a la primavera con rames y ropa nuevo nun ritual ancestral que, por muncho que quieran asimilar dende la ilesia, precede a la mesma nel tiempu, ye xunir llazos familiares con bollos y pegarates, pintar güevos nun vezu que se remonta a los vieyos dioses de la fecundidá y la primavera, en resume, ye allegría, folixa y llume, lo contrario a lo que nos quieren vender.

This work is licensed under a Creative Commons Attribution 4.0 International License.