Depués de cuasi 4 años del desagospiu del CSOA La Madreña la sociedá asturiana ta llamada otra vuelta a manifestase cola llegada del xuiciu contra’l parte de les persones que pasaren pel proyectu d’okupación
Güei, martes 3 y mañana, miércoles 4 de abril, xulguen a diez imputado@s por “usurpación” de magar la okupación del edificiu que demientres años furruló como cientru social La Madreña.
Poro convóquense concentraciones de sofitu que tendrán llugar esos díes a les 09:30 delantre’l Tribunal Superior de Xusticia d’Asturies, en la Plaza Porlier d’Uviéu.
De los cientos de persones que trabayaron y dieron vida a La Madreña y los miles que la defendieron, son diez los imputaos de manera dafechu arbitraria pola so okupación, dando la casualidá de que se cuntaben pente les persones más actives del movimientu 15 M, coleutivu qu’okupó esi edificiu pa denunciar una «operación d’especulación urbanística» nos díes previos a les eleiciones españoles. L’acusación solicita pa caún d’ellos una multa de 1.440 euros.
El del CSOA La Madreña foi un de los casos más sonaos de desagospiu d’un llar cultural, pero ye una dinámica que se repite: el pueblu recupera un edificiu abandonáu, igualu, da-y vida y aprofitamientu, ufre de baldre servicios a la comunidá y fina por ser desagospiáu, d’avezu -como nel casu de la Flex en Xixón- pa quedar de nueu avandonao o n’otres ocasiones pa ser oxetu -como nesti casu o el de El Mataderu en Sieru- d’especulación urbanística.
Redaición InfoAsturies
This work is licensed under a Creative Commons Attribution 4.0 International License.
