La pasividá de los asturianos frente al tratu discriminatoriu que l’executivu español nos aplica reiteradamente permite que se propongan pa Asturies los xorrecimientos mínimos n’inversión territorial
Nos presupuestos xenerales presentaos pol Executivu de Rajoy recuéyese una medría del 10%, frente al más del 15% n’España; pero lo grave nun ye’l porcentaxe en sí, sinón lo qu’eso significa traducio a los presupuestos concretos.
Pártese d’una situación misérrima: a Asturies correspondiéron-y unos escasísismos 211 millones d’euros nos presupuestos del añu pasáu. Al tratase d’una medría porcentual, atopamos un paralelismu interesante col casu de los pensionistes: non solo se recibe un aumentu risible, sinón que, al aplicase en forma de porcentaxe sobro la miseria previo, la resultancia ye de malpenes 22 millones de medría.
En realidá tamos falando d’un enorme descensu n’inversión territorial desque, nel añu 2009, les inversiones dedicaes a Asturies algamaron la cifra de 1.019 millones d’euros, baxando en 2010 pa quedase en 923. En 2011, retayáronse cuasi a la metá, hasta 556 millones -más del doble de la cifra actual- entamando una llínia descendente que desaguó nos mínimos 211 del añu pasáu. En total un descensu global de cerca del 80%.
Tampoco correspuende a los asturianos decidir sobro la finalidá d’esos fondos: van destinase principalmente pa infracadarmes, como la etenra Variante de Payares -obra na que yá s’invirtieron” 3.460 millones d’euros- o’l caltenimientu de los inútiles túneles del inesistente metrutrén de Xixón.
El motivu d’esta discriminación presupuestaria apúntalu la vicepresidenta del Executivu central Saénz de Santamaría nel discursu de toma de posesión del nuevu delegáu del Gobiernu en Asturies, Mariano Marín. Sigún el so puntu de vista «la llealtá d’esta comunidá al proyectu común d’España ye infrayable». Traduciendo, la falta de rempuesta énte les agresiones españoles de les que fai gala’l pueblu asturianu fai creer al executivu español que puede faer de menos a Asturies ensin peligru. Curiosamente ente los territorios más favorecíos por estos presupuestos, con medríes de más del 17% sobre unes partíes yá xeneroses, atópense aquellos que la so “llealtá” ye menos “infrayable”: d’aprobase los presupuestos Cataluña y el País Vascu van cuntar ente los más beneficiaos.
Llucía F. Marqués
This work is licensed under a Creative Commons Attribution 4.0 International License.
