El gobiernu del “Principado” planea suprimir nueve centros de caltenimientu vial, la mayoría nel ocidente d’Asturies. Pa la formación política Andecha Ástur esto ye una amuesa más del desdexamientu y la marxinación nel que l’alministración caltien a tola fastera rural del país, polo xeneral, y bien en concretu a la más ocidental

En contra d’esta midía manifestáronse los alcaldes de la zona, una y bones el mal estáu de les carreteres y la escasa llimpieza de les cunetes n’años anteriores yá creare argayos  y otros problemes enantes.

Polo xeneral, l’estáu de los caminos y carreteres del ocidente asturianu yá nun s’atopa en condiciones precisamente óptimes, polo que la eliminación d’estes brigaes supondría un pasu atrás n’una situación yá mala de por sí.

L’añu pasáu denunciárase la falta de reposición de material pal bon  desendolcu de les llabores de caltenimientu viariu nel Ocidente, y que la máquina encargada del tresporte de la rozaora -ente otra maquinaria- pasó bona parte l’añu inoperativa por nun pasar la ITV.

Andecha Ástur acusa al “Principado” de “discriminar al Ocidente asturianu, esaniciando servicios fundamentales y nun atendiendo les sos necesidaes, favoreciendo coles sos midíes el despoblamientu de bona parte del territoriu asturianu, acabando con una forma de vida y unes señes culturales úniques”

Nuria Prendes

This work is licensed under a Creative Commons Attribution 4.0 International License.