La convocatoria fecha pola Xunta la Defensa la Llingua Asturiana pa desixir la Oficialidá de la llingua nacional d’Asturies continua sumando sofitos

La unanimidá cola que la sociedá ta acoyendo esta convocatoria fae albidrar una participación masiva nel manifestamientu que saldrá de la Estación d’Uviéu a les doce del mediudíe del prósimu sábadu.

El partíu políticu Andecha Astur, la Plataforma Feminista d’Asturies, l’asociación de families pol asturianu Reciella, La Lliga Celta d’Asturies o los sindicatos CSI, USO y CCOO, amás de dellos músicos que ponen la banda sonora al eventu, son dalgunos de los sofitos más recientes que vien de recibir la movilización que ta consiguiendo implicar al conxuntu de la ciudadanía asturiana na defensa de la llingua’l país.

Andecha Astur,  únicu partíu qu’hestoricamente defendió la oficialidá tanto a nivel revindicativu como de fechu, afala “a tola población asturiana a acudir al manifestamientu que se cellebrará n’Uviéu el prósimu sábadu 21 d’abril pa desixir el reconocimientu llegal de los drechos de tolos asturianos y afalamos igualmente a tolos partíos políticos y asociaciones que participarán na convocatoria a pasar del posturéu a la aición, utilizando l’asturianu nes sos comunicaciones y poniendo los medios al so algame pa que la Oficialidá seya un fechu”.

Redaición InfoAsturies

This work is licensed under a Creative Commons Attribution 4.0 International License.