Colos nuevos sellos d’acesibilidá universal que vien d’entregar Xixón Turismu son ya 30 les empreses que tienen acreditao la so acesibilidá
Xixón Turismu, nel marcu del so proyeutu ‘Xixón con Calidá’, entregó ayeri tres nuevos sellos d’acesibilidá universal, acreditaos por PREDIF, a les empreses Autocares Cabranes, Hotel OCA Palacio de la Llorea y Sidrería La Montera Picona, que s’incorporen asina al ‘Programa d’Acesibilidá Turística de Xixón’.
Esti reconocimientu dase a los establecimientos turísticos que trabayen por ameyorar l’accesibilidá física de los sos negocios y l’atención al veceru con necesidaes especiales. En Xixón el visitante yá pue atopar 30 establecimientos y servicios adautaos y con un compromisu cola accesibilidá.
El programa d’acesibilidá ta abiertu a toles empreses que quieran realizar un diagnósticu de los sos servicios y sumase al puxu de Xixón Turismu por un turismu inclusivu.
Nel mesmu actu d’entrega, cellebráu na Casa Conceyu de Xixón, presentóse’l Manual de sofitu na Comunicación, empobináu a ameyorar la calidá de l’atención de les persones con necesidaes estres na comunicación. Ye un manual con información xeneral y turística de Xixón que facilita información pel mediu de pictogrames, lletra de llectura cenciella y en dos idiomes: castellán ya inglés, polo que los asturianos con necesidaes de comunicación especiales tendrán qu’escoyer ente ún d’estos pa recibir la información.
Con él facilitase la ufierta turística de la ciudá a persones con dificultá de comprensión y ameyórase l’atención y los servicios turísticos empobinaos a persones mayores, neños y neñes, persones con dislesia y, en xeneral, pa persones con dificultá de comunicación verbal pela mor del idioma o cualesquier otra naturaleza.
El manual tará a disposición de los hoteles, restoranes, museos y centros d’interés turísticos, nes oficines de turismu Infoxixón y nel centru d’atención de la sablera de Poniente.
Redaición InfoAsturies
This work is licensed under a Creative Commons Attribution 4.0 International License.
