La de güei foi una xornada especial pa los estudiantes que cursen asturianu: camudaron la clas pelos praos del Muséu del Pueblu d’Asturies y les lleciones de gramática por lleciones prautiques de llingua y cultura

Alrodiu de 600 escolinos de los istitutos de Xixón aconceyaron güei nel Muséu del Pueblu d’Asturies nuna xornada d’arruelu y llingua na que l’orpín nun foi torga pa que prauticaren los xuegos tradicionales del país -llave, bolos, xaronca, tiru cuerda, tiru de palu, llanzamientu de barra, carrera de panoyes y dexabolu. Tamién percorrieron les istalaciones del Muséu investigando les pistes d’una Gymkana cultural, compitieron nun reñíu concursu de llingua y esfrutaron d’un prestosu monólogu.

Arriendes d’ello, guardaron nuna caxa los sos deseyos pal futuru de Xixón, d’Asturies y de la so llingua, col envís d’abrila nos Alcuentros de la Mocedá cola Llingua que se cellebren dientro de cincu años y comparar con esa “cápsula del tiempu” les sos espeutatives cola situación real nel añu 2.023.

Nuria Prendes