Pente 2014 y 2016 denunciaronse n’Asturies 37 violaciones, 80 agresiones sesuales y 257 casos de abusos y acosu sesual. Nel primer trimestre del añu pasáu, les denuncies por violación foron 16 n’Asturies
Los datos del añu 2016, el caberu del que se tienen datos oficiales, son 220 denuncies por delitos contra la llibertá sesual. 67 d’ellos por abusos sesuales, cincu por violación -una d’elles a una menor-, once por acosu, 77 por agresiones sesuales y 19 d’abusu a menores. De los 220 casos presentaos nel 2016, namás 47 recibieron sentencia.
Los casos con más repercusión nesti mesmu añu foron les denuncies por violación en grupu d’una moza na Pola L.lena, la d’un mozu en Corvera, una posible agresión con posterior asesinatu en Nava y la d’una muyer n’Avilés, recién sentenciada como “agresión”, lo que fae albidrar que si nun se tomen midies la cifra del 2018 va superar ampliamente la ya dramática del 2016.
Al lleer estos datos nun podemos escaecer la dificultá que presenta el sistema xudicial español pa que un casu seya consideráu de violación, siendo tipificao como “agresión sesual” na mayoría de los casos, lo que desplica l’elleváu númberu correspondiente a esti delitu.
Nel informe apurríu pola Fiscalía del estáu, destácase que bona parte de los delitos contra la llibertá sesual tienen llugar dientro de la propia familia o ámbetu de confianza de la víctima, nel trabayu o’l domiciliu. Tamién recalca que los fechos nun avecen ser aisllaos sinon qu’aveza repitise, cola mesma o con estremaes víctimes, a lo llargo del tiempu.
Dende’l Centru d’Atención a Víctimes d’Agresiones Sesuales y Malos tratos d’Asturies (Cavasym), que lleva décades asistiendo a víctimes de la violencia sesual, declaren tamien que xorrecen les agresiones pente la xente mozo y adolescetes «Non solo ta aumentando sinon que tamién se siguen dando roles pente les rapaces de sentir, culpa, de non denunciar. Los mesmos patrones que esistíen hai 30 años no que cinca a la vergoña de la víctima». Como preba de la cantidá de fechos non denunciaos, les miles de participantes nel filu de Tuit #cuéntalo, nel que les muyeres relaten los abusos carecíos y non denunciaos.
Llucía F. Marqués
This work is licensed under a Creative Commons Attribution 4.0 International License.
