El proyeutu de regulación de la recoyida d’ocle d’arribazón propuestu pola Direición Xeneral de Pesca Marítima de la Conseyería de Desendolcu Rural y Recursos Naturales permitiría la estracción d’ocle nes sableres con tractor y rastrielles metáliques, menaciando l’equilibriu biolóxicu de la mariña

La recoyida del ocle qu’aporta a les sableres ye un métodu perfechamente caltenible de recuperación d’un pervalible recursu biolóxicu, siempres que se llinde a recoyer lo que la mar saca. Dexar, como se fai na actualidá, que s’arranque l’ocle de los fondos marinos pon en riesgu’l futuru d’un recursu biolóxicu marín llindáu, qu’actúa amás como abellugu de los pexes más piqueños.
Los pañadores manuales vense tamién  afeutaos pol espoxigue de tractores que, amás d’acabar cola produción y poner en riesgu la  futura, constitúin un pelligru direutu pa la so integridá física, al desixise a los tractores caltener una distancia de namás 2’5 metros, perxudicando una actividá tradicional con escasu impautu en beneficiu d’otra bultablemente dañible.

La norma vixente fasta agora prohibía espresamente l’usu d’artiluxos que floten, pero permitiráse l’usu de tractores con ruedes xigantes, que permiten la entrada na mar y el consiguiente arranque. Llegalizase con esta regulación rastrielles d’hasta 8 metros de llargor -que se vinieron utilizando ensin autorizar nos años pasaos- que, amás d’acabar col ocle, obliguen a somorguiar el motor del tractor n’agua mientres se produz la estracción, col impautu por cuenta de les fugues y averíes de los motores.

Per otra parte, el proyeutu nun recueye dalu  protocolu d’actuación nes sableres pa evitar la saturación d’estos vehículos nes sableres asturianes.

Redaición InfoAsturies

This work is licensed under a Creative Commons Attribution 4.0 International License.