La segunda movilización en defensa de la oficialidá de la  llingua nacional asturiana en quince díes saldrá de la Estación del Norte mañana a les siete y media, de onde aportará a les puertes del Teatru Campoamor, onde trescurrirá l’actu istitucional de l’Academia la Llingua Asturiana

Comu tolos años, l’actu istitucional de la Academia la Llingua Asturiana nel que se nomen nueves académiques vien precedíu d’un manifestamientu nel que se desixe’l respetu de los drechos llingüísticos de los asturianos y por ende, la Oficialidá de la llingua.

La peculiaridá d’esti añu ye qu’a esta convocatoria antecédela una perfuerte campaña y otru manifestamientu, el del 21 d’abril, nel que trentamil persones ocuparon les cais d’Uviéu revindicando esti drechu.

Estos díes la actualidá llingüística ta tamién marcada pola espirica entamada ante les declaraciones de la eurodiputada y candidata a la secretaría general de Podemos en Avilés, Tania Gonzalez, quien almitió que nun s’opondría a un referéndum pa decidir la Oficialidá del asturianu, lo qu’implica un retrocesu na postura oficial de Podemos, que fasta agora defendía que los drechos nun tienen que pasar peles urnes.

Nesi sen,  de Lola S. Vallina, responsable de la estaya de llingua d’Andecha Astur declaró que  ”Los asturianos nun pudimos votar nin l’estatutu que carecemos, nin les sos sucesives reformes, pero agora propónenmos que sometamos al criteriu de les urnes un drechu… ¿maxínense sometiendo a votación el drechu a la llibertá de prensa, al votu de la muyer o a la llibertá relixosa? ¿non? Pues el drechu al propiu idioma ta a esi nivel y aceutar un referéndum que la ponga en duda quita-y el rangu mesmu de drechu que tantos años venimos revindicando”. Nes sos declaraciones tamién destacó la importancia d’acudir al manifestamientu del vienres  “P’afitar qu’esiste un vraeru compromisu y que lo del 21 d’abril foi daqué más que posturéu d’un díe”  remembrando tamién la importancia de tar sollertes, una y bones  se consiga la Oficialidá “pa que nun mos vendan una Oficialidá de segunda, erma de conteníu y consecuencies”.

Redaición InfoAsturies

This work is licensed under a Creative Commons Attribution 4.0 International License.