Once asociaciones soliciten al Conceyu de Xixón, al “Principado” y a la Universidá una solución al problema del bancu de xermoplasma  del xardín botánicu de Xixón

El Bancu de Xermoplasma Vexetal allugáu nes instalaciones del Xardín Botánicu Atlánticu de Xixón, tien por finalidá’l desendolcu d’una llínea d’investigación sobro bioloxía y caltenimientu de granes d’especies d’interés pal caltenimientu, principalmente plantes menaciaes y estructurales d’hábitats menaciaos. La so puesta en marcha tuvo llugar nel añu 2004 como un equipamientu que se financió coles aportaciones del gobiernu d’Asturies y de la Universidá d’Uviéu. Dende esi añu, los responsables del Equipu Científicu del Xardín Botánicu pertenecientes a la Universidá d’Uviéu, desendolcaron una intensa y enllargada llabor de recoyida y caltenimientu de granes pa la que cuntó cola desinteresada collaboración de l’Asociación d’Amigos del Xardín Botánicu, principalmente no tocante a les especies vexetales menaciaes y protexíes incluyíes nos Catálogos de Proteición d’Especies amenaciaes d’Asturies.

Dichu bancu disponía de los medios téunicos y humanos pa poder caltener mientres llargos plazos les granes, encapsulaeas ya en condiciones de temperatura y de humidá afayaices.

Xardín Botánicu de Xixón

La rotura por iniciativa del conceyu de Xixón, nel añu 2017, de los convenios qu’hasta esi momentu sirvieron de marcu de relación ente’l Conceyu, el gobiernu d’Asturies y la Universidá, acabó con esta collaboración y supunxo amás que la empresa responsable del Xardín Botánicu (DIVERTIA), prescindiere del Equipu Científicu Universitariu dende los entamos del añu 2017. Con esti proceder, el bancu quedó ensin los curiaos y atenciones necesarios y ye por ello, que, coincidiendo con unes fuertes agües, anubrióse la planta baxa l’edificiu. Esti incidente, según les manifestaciones a la prensa d’un catedráticu de la Universidá, “puede amenorgar la so capacidá investigadora y punxo en grave riesgu les granes ellí conxelaes”.

Les organizaciones ecoloxistes y conservacionistes firmantes ven necesario que se desixa l’adoción de midíes urxentes pal esclarecimientu d’estos fechos, al empar que s’adouten midíes urxentes n’orde a recuperar esti equipamientu públicu y a empresta-y l’asesoramientu y la dirección científica que precisa. Pa ello demanden la implicación de la Universidá d’Uviéu, del gobiernu d’Asturies y el conceyu de Xixón, Recuerden

tamién que’l mandatu de protexer y caltener el nuesu patrimoniu natural obliga a los responsables políticos, alministrativos y nel so casu a los xudiciales, a adoutar midíes llegalmente previstes, n’orde a enxuiciar les conductes que dieron llugar a estos fechos, por si les mesmes pudieren ser consideraes como imprudencies punibles, y en cualesquier otru casu, considerar como un incumplimientu del mandatu constitucional de proteición del mediu ambiente.

Suscriben los grupos que vienen darréu:

Coordinadora Ecoloxista d’Asturies

Colectivu Ecoloxista d’Avilés

Institutu pa la Calidá y l’Educación Ambiental-INSCEAM

Asociación Molin de Adela

Plataforma pa la Defensa de la Coordillera Cantábrica

Agrupacion vecinos y amigos de Llanes-Avall

Grupu de Ornitoloxia Mavea

Asociación Asturiana d’Amigos de la Naturaleza – ANA

Ecoloxistes n’Aición d’Asturies

Coleutivu de Vega en Defensa del Mediu Rural

Amigos de Xardín Botánicu

Redaición InfoAsturies

This work is licensed under a Creative Commons Attribution 4.0 International License.