Nel añu 2008 Andecha Astur presentó una denuncia énte la Oficina escontr’l Fraude de la X.E, la OLAF, pol marafundiu de fondos públicos nes obres del puertu xixonés, depués de que’l 20 de payares de 2007 el conseyu d’alministración aprobare’l sobrocostu de les obres y l’Autoridá Portuaria solicitare financiación suplementario de la Xunión Europea, recibiendo unos fondos que llegalmente nun podíen financiar sobrocostes

Diez años depués esti marafundiu demuéstrase llegalmente ya’l tribunal de cuentes sanciona con 137 millones d’euros por responsabilidá patrimonial venceyada a irregularidaes na ampliación portuaria al espresidente del Puertu Menéndez Rexach ya’l esdirector Díaz Rato, mientres sigue de manera paralelo la investigación penal de los fechos na Audiencia Nacional, na que se investiguen 31 escargos públicos y responsables empresariales.

Sicasí, los dos esdireutivos de l’Autoridá Portuaria de Xixón, consideraos responsables pol Tribunal de Cuentes por ser quienes firmaron los pagos, opondránse a esta demanda, alegando que los sobrocostos polos que se-yos reclama esta indemnización cuntaron con respaldu “al más altu nivel”, ello ye, col encontu del Estáu español y la supervisión de Puertos del Estáu “que yera l’organismu responsable de la so fiscalización”, polo que desixen que se busquen los responsables a nivel estatal y nun se-yos faiga arrecostinar coles fardes d’otros.

Redaición InfoAsturies

This work is licensed under a Creative Commons Attribution 4.0 International License.