Dientru’l Programa Añal d’Actividaes de la Lliga Celta d’Asturies, el prósimu sábadu 12 de mayu, a les 11:00h cellebraráse una visita guiao al castru Picu Castiellu de Fozana en Tiñana, conceyu de Sieru
Allugáu al sur del Conceyu de Sieru, el Picu’l Castiellu fue reconocíu y catalogáu por J. M. González nos años 50 del sieglu XX, quien lu consideró un castru de la Edá del Fierro. Sicasí, la revisión posterior de dalgunos de los materiales alcontraos na so superficie, especialmente de numberosos ciscos cerámicos, amosó que tuvo moráu en dómina tardorromana o post-imperial y na Alta Edá Media, lo que lu fae un castru d’especial interés.
La visita va ser presentada pol presidente de la Lliga Celta d’Asturies y guiao pol doctor n’arqueoloxía y participante nes escavaciones D. Alfonso Fanjul Peraza.
La Lliga Celta presenta esta actividá como “una actividá prestosa, llúdica, risondera y de baldre, válida para tou tipu de persones, de fácil acesu per una pista forestal pocu pindia y con una duración d’unos 20 o 30 minutos de paséu”. Nun ye precisa iscripción previa.
Nuria Prendes
This work is licensed under a Creative Commons Attribution 4.0 International License.
