Les organizaciones asturianes que formen parte de la Plataforma pola Escuela Pública (SUATEA, UXT, CCOO, FAPA Miguel Virgós y Sindicatu d’Estudiantes) convoquen el próximu martes 8 de mayu, una concentración a les 18:00 énte la Delegación de Gobiernu na Plaza España d’Uviéu
Esta movilización enmárcase nuna convocatoria estatal cola que pretende denunciase la situación na que s’alcuentra la escuela pública dempués de la paralización de la Subcomisión pal Pautu Educativu del Congresu de los Diputaos.
El reciénte abandonu d’esta subcomisión per parte de los representantes del PSOE, Xuníos Podemos y otros grupos parlamentarios dexa a la comunidá educativa nel mesmu escenariu que va un añu, coles contrarreformes del PP y la LOMCE entá vixentes, como tamién lo tán los retayos carecios pola escuela pública, que nun fueron revertíos.
Nesta concentración los docentes, pas y escolinos van desixir mayor financiamientu pa la Educación, la reversión de los retayos (baxada de ratios, recuperación de programes d’atención a la diversidá, amenorgamientu d’hores lleutives pal profesoráu, aumentu de la plantiya docente y supresión de los descuentos por enfermedá), más beques y aides al alumnáu y l’aprebación d’una nueva Llei consensuada cola Comunidá educativa.
Redaición InfoAsturies
This work is licensed under a Creative Commons Attribution 4.0 International License.
