La infracción clasifícose como bien grave, una y bones los daños causaos al dominiu públicu hidráulicu foren valoraos en más de 150.000 euros

La sentencia torna’l Recursu contenciosu alministrativu interpuestu pola entidá Arcelormittal España, S.A., contra l’anterior resolvimientu pola que-y fuera impuesta una sanción de 1.000.000 d’euros, amás de la obligación d’indemnizar los daños causaos al dominiu públicu hidráulicu na cuantía de 283.335,93 euros.

Los continuos arramaos convirtieron el calce d’esti ríu nun llugar altamente contamináu, como foi denunciao n’abondes ocasiones por grupos ecoloxistes, la postrera hai tan solo unes selmanes, cuando baxaba colloráu’l ríu y la ría.

Los fechos determinantes de la sanción consistieron – y nun fueron negaos nin aldericaos por Arcelor- nos arramaos d’agües residuales procedentes de la istalación y actividá industrial d’Acelor Xixón al calce del ríu Aboño, nel conceyu de Xixón, incumpliendo les condiciones afitaes na Autorización ambiental integrada por superación de los valores llendes d’emisión establecíos.
En concretu, de resultes de tomes realizaes pol Serviciu de Vixilancia Fluvial en cuatro feches ente agostu y payares del 2014, detectáronse en dos de los diecisiete puntos d’arramaos d’agües residuales la presencia mayoritaria de sostancies contaminantes non autorizaes.
La Coordinadora Ecoloxista d’Asturies, denunciante de los fechos recurríos, esperen qu’esta nueva sanción confirmada obligue a esta empresa a gastar perres en tratar les agües de procesu y nun vertiles ensin control, tantu na factoría de Xixón como na d’Avilés.

Nuria Prendes

This work is licensed under a Creative Commons Attribution 4.0 International License.