L’Asociación de Pas d’Alumnos d’Altes Capacidaes d’Asturies (APADAC) ye una de les 37 organizaciones participantes na campaña #enhorarioescolar, que quier sensibilizar a la comunidá educativa y a los responsables políticos de la necesidá de garantizar una atención educativa afayaiza a les altes capacidaes inteleutuales
Una de les carauterístiques más evidentes de les persones con altes capacidaes ye la velocidá d’aprendizaxe y la so dificultá para afaese a un sistema educativu ríxidu, repetitivu, pero sobremanera, llentu.
La mayoría de les midíes d’adautación curricular que l’actual sistema educativu español ufre a los escolinos con estes carauterístiques consisten en trabayos estras a realizar dempués de les xeres obligaes pa tola clas.
Esceicionalmente, pueden recibir formación estracurricular, según les sos necesidaes ya intereses, entamada y financiada pola Alministración Pública, pero n’horarios extraescolares. Ello ye, un menor con AACC va tener más deberes, más trabayos y más hores de clase, inclusive en fines de selmana, pesi a que tán capacitaos pa deprender muncho más en muncho menos tiempu y con muncho menos esfuerzu. Esti sistema ye percibíu por munchos d’ellos como un castigu, y de fechu pue considerase que más hores de clase y más xeres, yelo.
Poro 37 asociaciones de AACC xuniéronse pa desixir que l’atención educativa a les altes capacidaes se lleve alantre dientro l’horariu escolar y de manera inclusiva, en beneficiu del so desendolque integral, atendiendo a les sos necesidaes educatives especiales dientro’l centru educativu y siendo una opción complementaria, non sustitutoria a l’atención educativa que tien de recibir l’escolín nel so centru educativu.
Pa ello animen a tol que quiera participar escribir una entrada en twitter, páxina de facebook, o en perfil personal con visibilidá “Pública” col hashtag #enhorarioescolar.
Les asociaciones defenden que, d’alcuerdu a la llei, esta atención tendrá de tar recoyida nel Plan de centru nel separtáu d’Atención a la Diversidá y aplicada polos profesores. Esta atención va poder realizase na aula ordinaria y n’agrupaciones específiques fuera d’ella pero siempres dientro’l centru y horariu escolares, tal que desixe la llei.
Como primer pasu, piden a les alministraciones que faigan cumplir la normativa vixente que regula l’atención educativa al alumnáu d’Altes Capacidaes.
La LOE , modificada pola LOMCE, reconoz específicamente la necesidá de dar una atención educativa estremada a la ordinaria a los escolinos con altes capacidaes intelectuales, recoyendo la obligación de disponer de los medios necesarios pa que tol l’alumnáu algame’l máximu desendolque personal, inteleutual, social y emocional que dexe que los alumnos con altes capacidaes puedan desenvolver al máximu les sos capacidaes, teniendo los centros educativos autonomía para poner en furrulamientu planes d’atención específicos.
Llucía F. Marqués
This work is licensed under a Creative Commons Attribution 4.0 International License.
