Una recoyida de robles reclama’l drechu de los miles d’ asturianos esiliaos n’España a votar por Asturies nes prósimes elleiciones autonómiques

Acordies la llei elleutoral vixente, los asturianos que viven en países que nun seyan España si puen votar nes elleiciones asturianes, entantu que los que tan espatriaos n’España nun tienen drechu a votu.

Nel pidimientu recuéyese’l fechu de que la gran mayoría d’estos asturianos viven y tan empadronaos fuera d’Asturies escontra la so voluntá y forciaos pola situación económica a trabayar en llugares como Madrid, Valladolid, Valencia o Barcelona. Al tener que votar onde tan empadronaos, impídese-yos escoyer p’Asturies col so votu les polítiques que más diben facer por que pudiesen tornar al llar, daqué paradóxico dafechu ya que precisamente los que pierden el drechu al votu son les víctimes de les polítiques fallides puestes en práutica por un gobiernu al que nun puen votar.
Énte la posible reforma de l’estatutu d’autonomía pa incluyir nelli la oficialidá del asturianu, pídise que s’aprofite esta reforma estatutaria pa garantizar el drechu a votu de los esiliaos económicos.
Esto ye fácil, llegal y constitucional dafechu, reformando l’Artículu 7 del Estatutu d’Autonomía de tala miente que garantice que les presones que ten vivíos dellos años n’Asturies, al empadronase n’otra Comunidá  Autónoma puedan escoyer onde quieren exercer el so drechu al votu, si nel llugar nel que viven por mor de la situación económica, o n’Asturies, el país en que nacieron, nel que vivieron y al que tán venceyaos afeutivamente.
La propuesta, que yá cuenta con cientos de sofitos, fina pidiendo la robla a tolos asturianos, residentes o non n’Asturies “porque mañana, l’esiliáu económicu bien podíes ser tu, y sábeslo.”

Redaición InfoAsturies

This work is licensed under a Creative Commons Attribution 4.0 International License.