Esta ye la tercer acreditación d’escelencia que recibe l’HUCA, tres d’algamar una pola so unidá d’insuficiencia cardiaca en xunu del 2017 y otra pola téunica d’ecocardiografía trasesofágica, en marzu d’esti mesmu añu

El Serviciu de Cardioloxía del Hospital Universitariu Cientral d’Asturies vien de recibir de la S.E.C l’acreditación d’escelencia asistencial poles sos intervenciones de implante percutáneu de válvula mitral. Esti reconocimientu dase a aquellos cientros sanitarios que cunten colos más altos parámetros de calidá, marcando los estándares d’actuación nos procesos.

P’algamar la so concesión, l’HUCA pasó previamente pola revisión de tola documentación relacionada, una auditoría, visites a les istalaciones ya entrevistes colos equipos, después de lo que’l comité científicu encargáu emitió un certificáu que reconoz el cumplimientu perfechu de los estándares afitaos.

La intervención, que consiste na reparación o sustitución de la válvula mitral del paciente mediante una implantación introducía de manera percutánea con un catéter, ta especialmente indicada n’aquellos pacientes con insuficiencia mitral sintomática que nun puedan ser operaos.

Redaición InfoAsturies

This work is licensed under a Creative Commons Attribution 4.0 International License.