Andecha Astur convoca pal sábadu 26 el XXI Díi d’Andecha, coincidiendo cola  alcordanza del primer actu d’autodetermín d’Asturies na dómina contemporánea

El 25 de mayu del 1.808  ye una fecha clave na hestoria d’Asturies. Esi díi la Xunta Xeneral decide, baxo la presión del pueblu asturianu, proclamase soberana rebelándose escontra les tropes franceses qu’invadieren el país, asumiendo tolos atributos d’un estáu soberanu, talos como la bandera, exércitu propiu (l’Exércitu Defensivu Asturianu, con 30.000 homes de tolos conceyos) ministerios y embaxadores, consiguiendo  l’Exércitu Defensivu Asturianu al traviés del unvíu d’embaxadores el sofitu d’Inglaterra, qu’apurrió material de guerra pa lluchar escontra les tropes de Napoleón.

Nesta declaración la Xunta Xeneral d’Asturies reconoz esplicitamente la soberanía popular asturiana, xurando caún de los sos componentes que “ El poder, tol poder, reside y procede del pueblu”, y declarando en consecuencia la soberanía ya independencia d’Asturies, no que costitúi’l primer actu d’autodetermín d’Asturies na dómina contemporánia y un nidiu actu d’afirmación de la capacidá d’Asturies de ser dueña del so futuru.

Nesta fecha, amás, crease la primer versión de la bandera d’Asturies, diseñada por Xovellanos perasemeyada a l’actual, que llevaba la cruz de la victoria y el llema “Asturies xamás vencida”. N’aquella España entá nun tinía más bandera que’l pendón exclusivamente militar.

Cuando al otru añu una intervención militar punxo fin a la Xunta Soberana, la llinia argumental de Xovellanos na so defensa foi el fechu de que la Xunta asturiana ye preesistente a la española, porque tien sieglos d’antigüedá, y polo tantu aquella nun tien autoridá pa disolvela, pero nun consiguió con ello caltener la nuesa soberanía.

Coincidiendo con esta fecha, el 25 Mayu, Andecha Astur cellebra esti sábadu 26 el so XXI Díi d’Andecha con estremaos actos ente los que destaca un actu d’homenaxe al 25 Mayu de 1808 cola colocación d’un ramu lloréu a les puertes de la Sala Capitular onde tuvo llugar va 210 años la mencionada declaración de Soberanía.

L’añu pasáu dende Andecha Astur reclamóse a l’actual Xunta Xeneral del “Principado” qu’asumiere los fechos hestóricos y los conteníos políticos d’aquel 25 mayu de 1808 y, como continuadora d’aquella Xunta, aprebe una resolución afitando que la soberanía reside nel Pueblu Asturianu, oficializándose la cellebración istitucional d’esta fecha como espresión y reivindicación del drechu a decidir que mos correspuende, reclamación qu’enxamás nun foi retrucada.

Llucía F. Marqués

This work is licensed under a Creative Commons Attribution 4.0 International License.