Seique’l preslle del Pozu Carrio, en Llaviana, nun tendría que dase fasta avientu del 2018 (acordies al plan d’empresa) los trabayaores ven nes maniobres d’Hunosa la intencionalidá de dir presllando yá les istalaciones, tratando d’evitar futuros conflictos

El de Carrio ye, xunto col de San Nicolás, n’Ablaña, y el de Santiago,  n’Ayer, ún de los que tienen previstu’l so preslle’l prósimu 31 d’avientu, según figura nel plan d’empresa, que diz afayase asina a la direutiva 787 de la Xunión Europea según la que se presllarán les istalaciones mineres “non rentables”. Esta decisión afeutará a más de mil mineros de la plantiya pública y otros 300 de les subcontrates, dando un golpe mortal al que foi un sector vital na economía y la movilización social asturiana y dexando a les cuenques mineres ensin malpenes espeutatives llaborales.

El primer pasu p’adelantar esti preslle, aseguren dende  la seción sindical de la CSI nel Pozu Carriofoi la subcontratación de tolos talleres d’esplotación del pozu “col acuerdu de toles partes sociales implicaes” -lo qu’inclui la connivencia de los sindicatos mayoritarios-.

Siguen dándose categoríes, col envís d’afalalos a treslladase a otros pozos onde podrán aprofitar los beneficios de les sos categoríes, ya que col preslle previstu nel fin d’añu, nun tien sentíu tener trabayaores d´arranque nin de preparación y les subcontrates tienen ya cubiertos los puestos de categoría. Asina consiguen estos trasllados, que tienen que ser “voluntarios”, quedando el pozu escasu de personal con categoríes superiores.

Una bones que marchen, alvierte la CSI , va resultar que la plantiya nun algama, en vacaciones, pa dos relevos de extracción (eso caltién la empresa) quedando como solución mandar a les subcontrates de vacaciones n’agostu y a los que tengan que trabayar, en comisión de serviciu. Lo qu’equival a dicir que ta presllao por vacaciones -daqué que amás, contravien el Conveniu Coleutivu no que cinca al drechu d’escoyer les feches de les vacaciones-

Cuando se vuelva, de nun haber un bon serviciu de caltenimientu de les ramples, los mineros toparánles medio fundíes, lo que facilitará que s’entame a desmantelar antes de tiempo, llevando a un preslle alantráu al que ye l’únicu pozu del Nalón n’activu.

Llucía F. Marqués

This work is licensed under a Creative Commons Attribution 4.0 International License.