Los represores n’Asturies mientres el franquismu non solo nun fueron depuraos, sinón que munchos d’ellos fueron premiaos con ascensos o cargos de responsabilidá, especialmente demientres el mandatu del PSOE

Cuando la conmoción polos privilexos de “Billi el Niño” apaez en tolos medios nun podemos escaecer tolos represores que mientres la dictadura española exercieron n’Asturies y güei siguen la so vida con absoluta impunidá.
Dos d’ellos atópense ente los investigaos pola xueza arxentina María Servini: el policía Pascual Honrado ya’l guardia civil Fernando Caro.

Son los únicos denunciaos nesta querella, pero hai munchos otros que, comu ellos,  non solo nun fueron castigaos, sinón qu’esfrutaron de reconocimientu y promociones profesionales. Inclusive’l cabezaleru sindical mineru del SOMA-UXT y home fuerte del PSOE n’Asturies mientres la Transición, José Ángel Fernández Villa, ye mentáu nel llibru Clandestinos – del historiador José Ramón Gómez Fouz- como chivatu y delator énte’l xefe de la Brigada Politico-Social d’Asturies, Claudio Ramos.
La querella n’Arxentina contra Pascual Honrado de la Fonte ye simultánea a la recién interpuesta pol coleutivu de víctimes del franquismu Comuña d’Asturies, les mesmes que yá presentaron una denuncia nel añu 2014 y que nel 2015 reclamaron la estradición de los torturadores. Pascual Honrado, man drecha na Brigada Políticu-Social de la dictadura n’Asturies, tamién tien la so medaya, la cruz al méritu policial con distintivu colloráu. En plena “democracia” ye ascendíu, pesí a les múltiples acusaciones y denuncies de tortura n’Asturies.
El Teniente coronel de la Guardia Civil Fernando Caro Lería, el “Capitán Caro”, ye otru de los nomes que s’atopen na querella arxentina. Na democracia caltien el so puestu ya inclusive llogra ascensos. En 1981 ye comandante de la Guardia Civil de la so ciudá, Málaga, y sofita ensin ambages l’intentu de golpe d’Estáu de Tejero. Pasó a la reserva’l 17 d’avientu de 1992, con 58 añu. Güei vive nel centru de Málaga.
Antonio Garrido Fernández, policía del Políticu social y infiltráu na UXT, aportó a Uviéu a mediaos los años sesenta. Foi elli el que dirixió la operación que finó’n 1973 cola detención y encarcelamientu de Santiago Ibáñez y Carmen Masip Hidalgo, que rellaten los maltratos carecios mientres la so detención. Cuando’l PSOE ganó les elleiciones de 1982, Garrido foi nomáu xefe cimeru de Policía de Madrid, cumpliendo la profecía qu’él mesmu ficiere “El díe que ganen los roxos yo voi siguir de policía”. Agora vive ente Madrid y Uviéu

Julio Bregón, de la Brigada Políticu-Social, aportó a ser nomáu Direutor Xeneral d’Interior por Vicente Álvarez Areces nel añu 2002, anque la indignación de les sos munches víctimes obligáronlu a abandonar el cargu en menos d’un mes.
A Palacios, tamién policía de la Brigada Políticu social, direutamente llegó a dase-y el cargu de xefe de la Policía en Mieres, la mesma zona na qu’exerció la so brutalidá, onde  continuó col puestu dica la so tranquila xubilación.
La llista podría siguir, pero’l resume siguiría siendo’l mesmu. Los asturianos nunca vieron nin siquier reconocíos los crímenes que contra ellos se cometieron. Cuarenta y tres años dempués, la dictadura española ta vixente y los sos lleales caltienen la impunidá énte cualquier tipu de crime; los fieles y los sos sucesores son inclusive parte importante de los pegoyos sobro los que se sofita la democracia española y atópense’n tolos ámbetos de poder. Franco, como bien dixo, dexólo tou atao y bien atao.

Llucía F. Marqués

This work is licensed under a Creative Commons Attribution 4.0 International License.