Más de 1500 especialistes aportarán a Xixón en xunu pa participar nel congresu de la S. E. de Cirugía Plástica, Reparadora y Estética (SECPRE), la xunta añal de la seición d’Hemodinámica y Cardioloxía Intervencionista de la S. E. de Cardioloxía y el Congresu Nacional d’Uroloxía
La S. E. de Cirugía Plástica Reparadora y Estética (SECPRE) va celebrar dende guei y dica’l sábadu en Llaboral Ciudá de la Cultura’l so congresu añal, que tará presidíu pol ciruxanu plásticu asturianu Jesús Barón, que, xunto a los tamién doctores Carlos del Cacho, presidente de la SECPRE, y Ana Jiménez, secretaria xeneral d’esta sociedá, van treslladar a la prensa la situación de la ciruxía plástica y les sos tendencies.
A les 13.00h tendrá llugar la inauguración oficial d’esti alcuentru, que trae a Xixón a 150 especialistes foriatos que van ufrir clases maxistrales. A la inauguración acude la conceyala d’Educación y Cultura Ana Montserrat López Moro.
Nun ye la única xunta médica que se celebra en Xixón en Xunu. Del 6 al 8, más de 500 especialistes acudirán, nel Palaciu de Congresos, a la Xunta Añal de la Seición d’Hemodinámica y Cardioloxía Intervencionista de la S. E. de Cardiología.
Esa cifra de mélicos sedrá superada pola cita siguiente, de nueves na Llaboral Ciudá de la Cultura. Del 13 al 16 de xunu, el Congresu Nacional d’Uroloxía prevé una participación d’ente 600 y 1.000 especialistes.
Redaición InfoAsturies
This work is licensed under a Creative Commons Attribution 4.0 International License.
