La dantesca imaxe de la sablera San Llorienzu estrada d’aguarones nun mar de mierda valió pa visibilizar un problema endémicu: la completa desidia faza’l nuesu país, por tierra, mar y aire

L’añu pasáu nun llovía. Foi un branu secu, impropiu d’Asturies, siguíu d’una seronda escasa d’agua. Les cifres de la contaminación subieron perriba, mui perriba, de les llendes permitíes pa la salú. Ñubes de povisa de carbón pintaron la sablera de San Llorienzu de llutu.

Nun ye culpa de nueso, dixeron, tien que llover, falta agua. La culpa de tanta porquería ye del clima, nun llueve, tien que llover.

Punxéronmos a toos a baillar la dancia la lluvia. Que llueva, que llueva, la bruxa ta na cueva; y llovió: la tierra ensuchó’l bencenu, les partícules, el diósidu d’azufre, l’osidu de nitróxenu, comu si cayendo a tierra (ergo tamién a los acuíferos) ya nun emporcare.

Pero que si quies, con agua o sin ello nun hai selmana que nun mos aporte información d’un picu inadmisible nos niveles de contaminación atmosférica.

Agora llueve. Asgaya. Sedría de xacíu que n’Asturies tuviéremos preparaos pal agua, pero non, l’agua tamién ye un problema.

Los coleutores (non solo el de Xixón) rebosen mierda, lliteralmente. Los aguarones muertos semen la sablera, contribuyendo a un escenario (y un arrecendor) apocalípticu. L’alcaldesa diz que nun pasa na, pero nun se baña.

Les carreteres fienden, los árboles caen, nadie tuvo la previsión de preparar los tarrenes amburaos l’añu pasáu pa que l’agua nun marche cola tierra.

Arcelor Mittal, sí, otra vegada Arcelor, aprofita’l bastiazu pa quemar a gusto. A ríu revueltu, ganancia de pescaores, dicen.

Cuenten que, como consecuencia del desbordamientu’l ríu LLongas, anubriéronse los fosos y sótanos de la Acería LDA, obligando a tomar midíes d’emerxencia, ello ye, “trasegar dos cuyares d’arrabiu a los vagones torpedo pa evitar la solidificación”. Nun toi cierta de lo que quier dicir eso, pero lo que si sé ye que llueva, nieve o faiga sol siempres topen esculpia pa entafarranos los polmones.

Nun mos engañemos, qu’esta fore mui gurdia nun quier dicir que nun seya avezao. Les emisiones d’Arcelor, los reboses en coleutores y los arramaos diversos a les agües fluviales y marítimas son continuos y la pasividá de les alministraciones, criminal.

Llucía F. Marqués

This work is licensed under a Creative Commons Attribution 4.0 International License.