Concentración güei a les doce en rempuesta al suicidiu ayeri d’otru home cuando diba ser desallugáu pola fuercia de la so casa
Toles Plataformes d’Afeutaos poles Hipoteques del estáu aconceyen güei a les puertes del “Banco Popular”, entidá responsable del desfiuciu que llevó a Jordi R.F, electricista de 45 años que nun foi quien a aguantar más, fasta’l mesmu suicidiu.
El pisu, del que Jordi y la so pareya, María, nun pudieron siguir pagando l’alquiler, forma parte de la cartera de activos inmobiliarios Quasar, que pertenez al Bancu Santander (49%) y al fondu inmobiliariu Blackstone (51%). La cartera ta compuesta por activos del “Banco Popular” adquiríu pol Santander por un euru l’añu pasáu.
Foi el Popular quien entamó’l desfiuciu de Jordi y María por impagu de la renta, pero depués pasó la xestión del inmueble a los ‘servicers’ (xestores inmobiliarios de la banca) Aliseda y Anticipa, despersonalizando progresivamente les xestiones y allonxándo la cuestión humana implicada.
Ca añu repítense los suicidios por desfiucios, siendo’l más prietu’l 2013, con más de venti muertes rexistraes por esti motivu, pero acumulándose cifres que respiguen añu tres d’añu. Pa les Plataformes d’afeutaos pola Hipoteca estos suicidios nun son tales, sinón asesinatos inducios por intereses económicos.
Güei, en Xixón, a les doce del mediudíi na Plaza 6 d’Agostu la PAH d’Asturies convoca una concentración pa desixir la puesta en marcha de les midíes que seyan precises pa solucionar el seriu problema de falta de vivienda que se carez.
Llucía F. Marqués
This work is licensed under a Creative Commons Attribution 4.0 International License.
