Mientres la dictadura española, los nomes asturianos taben prohibios – esceición fecha de Covadonga y Pelayo- lo que desplica que la proporción de nomes asturianos pente la población seya escasa
Nómome Llucía. Nací nel añu 1.974, a piques de la muerte de Franco. Presumo de ser la primer persona asentada llegalmente col nome n’asturianu depués de la dictadura española. Nun foi fácil.
Pa que’l mio nome apaeciere nos documentos los mios pas tuvieron de bregar años; remémbrome ya mayoruca esperando na comisaría mientres peleen col funcionariu de turnu y la so sorrisa cuando salimos colos papeles na man que me daben permisu pa ser yo, con toles lletres.
De magar entós la recuperación de nomes tradicionales ye innegable, tando presente de manera especial nos colexos ya istitutos, ya que ye nes nueves xeneraciones nes qu’alcontramos más nomes de raigañu.
Anguañu, seique dalgunos funcionarios entá traten de poner torgues a les families a la hora’l rexistru, la llei reconoz los nomes asturianos, siendo posible non solo rexistrar con ellos a los recién ñacios, sinón camudar el nome más alantre por voluntá propia, esistiendo formularios específicos p’asturianizar el nome, disponibles en tolos rexistros civiles.
Llucíes sigue habiendo poques, somos 6 en total, y les Covadongues siguen siendo mayoría, 1942, con una media d’edá de 40 Años. Tres d’elles, con 965 muyeres rexistraes, vienen les Olayes pisando fuerte, siguíes de lloñe poles Nores (421), Llares (357), Deves (322), Sires (195), Xanes (150), Lenes (68), Nidies (29) y presllando la llista de les diez nomes asturianos más usaos pa muyeres, Maeva, con 14.
No que cinca a homes, tres del míticu Pelayo que se caltién con 2.326 rexistros, vien Enol con 917, siguíu polos 577 Iyanes, los 414 Neles, 87 Asures, 73 Xurdes, 40 Xuanes, 33 Xabeles, empataos con otros tantos Colases, 28 Xunes y 22 Llorianes.
Un fenómenu reciente y enforma interesante que se ta dando ye l’apaición de nomes de nuéu alcuñu, vinientes de topónimos o de pallabres con otru sen, xeneralmente válidos pa tolos xéneros, comu Sele, Ibias, Dobra o Llume.
Llucía F. Marqués
This work is licensed under a Creative Commons Attribution 4.0 International License.
