La enmienda presentada na cámara alta por Compromís, na que se proponía equiparar la llingua asturiana col restu de les del estáu español, concediendo 100.000 euros de los Presupuestos Xenerales del Estáu a la Academia de la Llingua Asturiana foi refugada col votu en contra de tolos senadores asturianos
Tres de pasar pola estraña situación de que los senadores asturianos nun reclamaren lo qu’Asturies correspuende, permitiendo que seyan los valencianos quienes lo faen, Fernando Goñi, Mario Arias y Ovidio Sánchez del PP; María Luisa Carcedo y Vicente Álvarez Areces del PSOE y Rosa María de Posada por Foro votaron como ún solu, faciendo piña como poques vegaes y obviando les sos desemeyances de partíu p’amosar la so unanimidá y facer autoboicot, refugando les perres que se pusieron al algame de tolos asturianos pa la defensa la nuesa llingua.
Esti votu en contra choca coles declaraciones pro-oficialidá feches pol partíu socialista nel caberu añu, dexando ensin conteníu el so posicionamientu, al amosar que per delantre de too ta la fidelidá a les direutives del partíu centraliegu.
Tamién se contradiz col argumentu utilizáu polos populares de que la Oficialidá “sedría un sobrecoste” p’Asturies, ya que nesti casu lo que mos fae perder perres ye precisamente la so firme oposición a tolo asturiano.
Llucia F. Marqués
This work is licensed under a Creative Commons Attribution 4.0 International License.
