Mañana inaugúrase nel centru Niemeyer una esposición de sesenta obres del conocíu pintor impresionista valencianu, procedentes de les colecciones de Pedro Masaveu
L’amuesa va tar disponible dende mañana y dica dientro de mediu añu nel edificiu La Cúpula del avilesín Muséu Niemeyer y va cuntar con sesenta obres, de temática preminentemente marítima y costumista, incluyendo una de les sos pintures más conocíes, “Corriendo pola sablera”, un de los dolce cuadros que davezu podemos atopar nel Muséu de Belles Artes d’Asturies. Otres obres que cabe destacar dientro de la esposición son “Tresportando les uves” y “La familia de don Rafael Errázuriz Urmeneta”.
La esposición lleva’l nome “Pedro Masaveu: pasión por Sorolla” yá que 46 de les 60 obres espuestes pertenecen a la Coleición Masaveu y les 12 restantes proceden del Muséu de Belles Artes de Asturies, pero formando parte tamién de les 400 obres de la Coleición Pedro Masaveu que dende 1994 s’alcuentren depositaes na principal pinacoteca’l país.
Redaición InfoAsturies
This work is licensed under a Creative Commons Attribution 4.0 International License.
