En Ferrari dulden enforma y Leclerc paez la opción más probable pa sustituir al finés.

Y ye que’n Ferrari tienen munches duldes, y son munchos los bilordios que s’espardieron poles redes. Pente ellos, apaez la opción, más lóxica aparentemente nestos caberos meses, que ye’l fichaxe de Ricciardo pola escudería italiana, o’l tamién comprensible fichaxe del otru pilotu de Red Bull Max Verstappen.

A Ferrari tamién-y salieron otres “novies”, ya que toos se decaten de que la idega de siguir estrumiendo a Raikkonen fasta la so retirada antóxase complicada, dao que´l rendimientu del finés ye ca vegada peor, y nun sirve como escuderu del alemán Sebastian Vettel. Un d’esos pretendientes, ye nin más nin menos que Fernando Alonso, el veteranu asturianu, nun se siente conforme col so McLaren, y quier colar yá de la escuería Inglesa.

Otru pilotu veteranu interesáu en pilotar la prósima campaña en Ferrari ye’l Polacu Robert Kubicka, quien yá amosó’l so ritmu como pilotu probador en Williams, con unos tiempos meyores a los de los dos pilotos oficiales. Quien sabe si’l polacu va volver a la máxima competición pela puerta grande tres el so tarrecible accidente del 2011.

Pero pente tou esti barullu de fichaxes, lleendes y campeones del mundiu, apaez una cara poco conocida na parrilla la fórmula ún: el consideráu el meyor pilotu de la hestoria de fórmula 2/gp2,  Charles Leclerc. Metió’l Sauber per primer vegada en Q3, siendo’l primer pilotu en faelo dende 2015, consiguiendo la meyor posición de clasificación de la hestoria de Sauber dende 2012. Collechó 11 puntos en 8 carreres. El monegascu impresiona en Maranello.

En Ferrari dulden enforma, yá que siempres apuesten por pilotos esperimentaos, pero nun hai dulda de que Leclerc yá demostró’l so nivel y capacidá, llevando’l Sauber a metá de tabla, lluchando con coches bien cimeros como los Renault, McLaren y Haas.

Dende Ferrari tamién suena la idega de formar una pareya esplosiva nel equipu Haas, de nivel superior al Sauber, pero nun ye’l del Ferrari oficial nin tanto. Y ye que la idega ye nin más nin menos, que la de xuntar a Leclerc cola otra perlla de la casa, Antonio Giovinazzi. Años dempués un de los dos, o dambos, seríen xubíos a Ferrari.

La opción actual más lóxica, a la mio forma de ver, ye la del ascensu direutu a Ferrari del pilotu monegascu.

Nel Dos Santos

This work is licensed under a Creative Commons Attribution 4.0 International License.