Andecha Astur, N’Ast, Remanecer, La Llegra, Andecha Mocedá y otres organizaciones defenden la participación de la Seleición Asturiana de Fúbol na Copa’l Mundiu

En plena cellebración del Mundial de Fúbol de Rusia, son abondes les voces que reclamen la recuperanza del puxu de la que ye la nuesa Seleición nacional, un equipu con más d’un sieglu d’hestoria, aniciáu enantes de la propia Seleición española y que compitió con Seleiciones de nueve países dende’l so primer partíu, escontra Catalunya nel 1917, fasta’l caberu que se-yos permitió xugar a nivel internacional, con Hondures, nel añu 2002, partíu nel qu’Asturies ganó por 5 a 3.

De magar entós, tres d’una racha na que la nuesa Seleición ganare a Lituania, Macedonia y México, empatando con Bruseles, foi relegada a partíos estatales, negándose-y la so condición de Seleición nacional y torgando a los asturianos dende hai 16 años ver a la so selección nacional nel “esporte rei” xugando al nivel que-y correspuende.

Los nacionalistes de tol estáu dan les gracies a la hinchada española nel Mundial de fúbol

Nel mesmu marcu del Mundial de fúbol, faese necesario comentar les caberes imáxenes de los siguiores de la Seleición española de fúbol, amosando una imaxen española, más española y muy española, “antroxaos de toreros y con peluques de collores, asesinos y payasos representando una parodia de si mesmos que sedría fasta divertío, polo grotesco, de nun ser porque implica la defensa d’unos valores mui concretos y que nun son denguna broma. Eso si, gracies a la imaxen que tan dando tol mundiu comprende porque reclamamos el drechu a nun ser españoles.  Nun podemos sentimos representaos por esa gandaya” declaró Arturu Bermeyu, voceru d’Andecha Astur.

Nuria Prendes

This work is licensed under a Creative Commons Attribution 4.0 International License.